ஆபரேஷன் சிந்தூர்: இரு அவைகளிலும் தமிழக எம்.பி.க்கள் அதிருப்தி

ஆபரேஷன் சிந்தூர் நடவடிக்கை விவகாரத்தில் மத்திய அரசு நடந்துகொள்ளும் விதத்துக்கு தமிழகத்தில் ஆளும் திமுக மற்றும் அதன் கூட்டணிக் கட்சி எம்.பி.க்கள் மக்களவை மற்றும் மாநிலங்களவையில் அதிருப்தி தெரிவித்தனர்.

- நமது சிறப்பு நிருபர்

நமது சிறப்பு நிருபர் புது தில்லி, ஜூலை 29:

இது தொடர்பாக மக்களவையில் செவ்வாய்க்கிழமை நடைபெற்ற சிறப்பு விவாதத்தின் இரண்டாம் நாள் அலுவலில் நாடாளுமன்ற திமுக குழுத் தலைவர் கனிமொழி பேசியதாவது: இந்தியாவுக்கு அச்சுறுத்தல் வந்தபோது, அரசுக்கு ஆதரவாக எதிர்க்கட்சிகள் ஒன்றுகூடி ஆதரவைத் தெரிவித்தன. ஆனால், மத்திய அமைச்சர்கள் எதிர்க்கட்சிகளுக்கு எதிராகப் பேசி வரலாற்றைத் திரிக்கின்றனர்.

ஆபரேஷன் சிந்தூர் குறித்து வெளிநாடுகளுக்கு விளக்கிய குழுவில் எதிர்க்கட்சிகள் இருந்ததற்காக நாங்கள் பெருமையடையவில்லை. இதற்குக் காரணம், இந்திய மக்களை காப்பாற்றும் நடவடிக்கையில் அவர்களை மத்திய அரசு கைவிட்டுவிட்டதுதான். தேர்தல் வரும்போதெல்லாம் மத்திய அரசுக்கும் பிரதமருக்கும் தமிழக கலாசாரம் மீது திடீர் பாசமும் பெருமிதமும் ஏற்படும். ஆனால், கீழடி அகழாய்வு கண்டுபிடிப்புகளின் மகத்துவத்தை ஏற்க அரசு மறுக்கும். இந்தியாவின் வரலாறு தமிழகத்தில் இருந்துதான் எழுதப்பட வேண்டும் என தமிழக முதல்வர் வலியுறுத்தினார். பிரதமர்கூட கங்கைகொண்டசோழபுரத்துக்கு வந்துதான் பாரத பாரம்பரியத்தை விளக்கினார். அந்தப் பெயரே பறைசாற்றும் - கங்கையைக் கொண்டவன் தமிழன், தமிழன் கங்கையை வெல்வான்.

இதை நினைவில் கொள்ளுங்கள் என்றார் கனிமொழி.