கூட்டுறவுக் கடன் சங்கங்களில் 'சிபில் ஸ்கோர்' முறை ரத்து

பெரம்பலூர் விவசாயிகள் கோரிக்கை

- 

பெரம்பலூர், ஜூன் 27: கூட்டுறவுக் கடன் சங்கங்களில் 'சிபில் ஸ்கோர்' முறையை ரத்து செய்யக் கோரி விவசாயிகள் வலியுறுத்தியுள்ளனர்.

பெரம்பலூர் மாவட்ட ஆட்சியரகக் கூட்டரங்கில் விவசாயிகள் குறைதீர்க்கும் நாள் கூட்டம், மாவட்ட வருவாய் அலுவலர் மு. வடிவேல் பிரபு தலைமையில் வெள்ளிக்கிழமை நடைபெற்றது. கூட்டத்தில் விவசாயிகள் பேசியது:

இந்திய கம்யூ. மாவட்டத் தலைவர் வீ. ஜெயராமன்: பெரம்பலூர் மாவட்டத்தில் திருமணம் நடைபெறும் இந்து சமய அறநிலையத் துறையின் கீழ் இயங்கும் கோயில்களிலும் கழிப்பறை வசதி செய்துதர வேண்டும். பெரம்பலூரில் தட்டுப்பாடின்றி குடிநீர் விநியோகிக்க வேண்டும்.

தமிழ்நாடு விவசாயிகள் சங்க மாவட்டச் செயலர் ஏ. ராஜு: விவசாயிகளுக்கு கோடை உழவு மானியம் மற்றும் மானியத்தில் வேளாண் கருவிகள் வழங்க வேண்டும்.

தமிழக விவசாயிகள் சங்க மாவட்டச் செயலர் வீ. நீலகண்டன்: விவசாயிகள் பயிர்க்கடன் வாங்க கூட்டுறவுக் கடன் சங்கங்களை அணுகும்போது சிபில் ஸ்கோர் பார்த்து, தகுதியிருந்தால் மட்டுமே கடன் வழங்கப்படும் எனக் கூறுவதால் பயிர்க்கடன் பெற முடியாத நிலை ஏற்பட்டுள்ளது.