அரிய வகை கனிமங்களை சீனா வழங்கும்; இந்தியா நம்பிக்கை

வாகன உற்பத்தித் துறையில் அதிகம் பயன்படுத்தப்படும் அரிய வகை கனிமங்களின் ஏற்றுமதிக்கு விதிக்கப்பட்டுள்ள புதிய கட்டுப்பாடுகள் குறித்து சீனாவுடன் நடத்தி வரும் பேச்சுவார்த்தைகளில் சாதகமான முடிவு கிடைக்கும் என நம்புவதாக மத்திய வர்த்தக துறைச் செயலர் சுனில் பர்த்வால் திங்கள்கிழமை தெரிவித்தார்.

- 

புது தில்லி, ஜூன் 16:

சமாரியம், டெர்பியம் மற்றும் டிஸ்ப்ரோசியம் உள்பட பூமியில் இருந்து அகழ்ந்தெடுக்கப்படும் 7 அரிய கனிமங்கள் மீது சீனா கடந்த ஏப்ரலில் சில ஏற்றுமதி கட்டுப்பாடுகளை விதித்துள்ளது.

மின்சார மோட்டார், பிரேக் அமைப்பு, அறிதிறன்பேசி, ஏவுகணை, வீட்டு உபயோகப் பொருள்கள் ஆகியவற்றின் உற்பத்தியில் முக்கியத்துவம் வாய்ந்த இந்தப் பொருள்களின் 90 சதவீதத்துக்கும் அதிகமான சர்வதேச விநியோகத்தை சீனா கட்டுப்படுத்துகிறது.