காலிறுதியில் மெத்வதெவ்; வெளியேறினார் சிட்சிபாஸ்

ஆண்டின் முதல் மாஸ்டர்ஸ் டென்னிஸ் போட்டியான இண்டியன் வெல்ஸ் ஓபனில், முன்னணி வீரரான ரஷ்யாவின் டேனியல் மெத்வதெவ் காலிறுதிச்சுற்றுக்கு முன்னேறினார்.

- 

இண்டியன் வெல்ஸ், மார்ச் 12:

ஆடவர் ஒற்றையர் ரவுண்ட் ஆஃப் 16-இல், போட்டித்தரவரிசையில் 5-ஆம் இடத்திலிருக்கும் மெத்வதெவ் 6-4, 6-0 என எளிதாக, 10-ஆம் இடத்திலிருந்த அமெரிக்காவின் டாமி பாலை தோற்கடித்தார். மழையால் சுமார் 4 மணி நேரம் இந்த ஆட்டம் தாமதமானது.

இத்துடன் டாமி பாலை 5-ஆவது முறையாக சந்தித்த மெத்வதெவ், தனது 4-ஆவது வெற்றியைப் பதிவு செய்திருக்கிறார். கடந்த ஆண்டு இதே போட்டியின் அரையிறுதியில் இவர்கள் நேருக்கு நேர் சந்தித்த போதும், மெத்வதெவ் வென்றது நினைவுகூரத்தக்கது.

இந்த முறை காலிறுதியில் பிரான்ஸின் ஆர்தர் ஃபில்ஸை அவர் எதிர்கொள்கிறார். போட்டித்தரவரிசையில் 20-ஆம் இடத்திலிருக்கும் ஃபில்ஸ் முந்தைய சுற்றில் அமெரிக்காவின் மார்கோஸ் கிரோனை 6-2, 2-6, 6-3 என்ற செட்களில் வென்றார். இதன் மூலம் அவர் முதல் முறையாக மாஸ்டர்ஸ் போட்டியின் காலிறுதிக்குத் தகுதிபெற்றுள்ளார்.