தஞ்சாவூர் மாமன்றக் கூட்டத்தில் மேயரை கண்டித்து திமுக உறுப்பினர்கள் வெளிநடப்பு

தஞ்சாவூர் மாநகராட்சி அலுவலகத்தில் திங்கள்கிழமை நடைபெற்ற மாமன்றக் கூட்டத்தில், கூட்டம் முறையாக நடத்தப்படவில்லை எனக் கூறி மேயர், ஆணையரைக் கண்டித்து திமுக உறுப்பினர்கள் வெளிநடப்பு செய்தனர்.

- 

தஞ்சாவூர், ஆக. 4:

மேயர் சண். இராமநாதன் (திமுக) தலைமையிலும், துணை மேயர் அஞ்சுகம் பூபதி, ஆணையர் க. கண்ணன் முன்னிலையிலும் நடைபெற்ற இக் கூட்டத்தில் நிகழ்ந்த விவாதங்கள்:

சி. வெங்கடேஷ் (திமுக): இந்தக் கூட்டத்துக்கான அறிவிப்பு 6 நாட்களுக்கு முன்பே கொடுக்கப்படவேண்டும். ஆனால் அவ்வாறு கொடுக்காமல், இன்று (திங்கள்கிழமை) காலை தான் எங்களுக்கு வந்தது. கூட்டப் பொருள் நகல் 21 உறுப்பினர்களுக்கு கொடுக்கப்படவில்லை.

ஆணையர்: கூட்டப் பொருளில் தீர்மானங்கள் சேர்க்கப்பட வேண்டியிருந்தன. அதனால், கால தாமதம் ஏற்பட்டது.

மேயர்: இனிமேல் கூட்டம் நடத்தப்படும்போது 6 நாட்களுக்கு முன்பே அறிவிப்பு கொடுத்து நடத்த நடவடிக்கை எடுக்கப்படும்.

ஜி. ஆனந்த் (திமுக): நாங்கள் பேசுவதைப் பயனளிக்கும் விதமாக எடுத்துக் கொள்வதில்லை. எனவே, இக்கூட்டத்தை ரத்து செய்ய வேண்டும். இல்லாவிட்டால் மேயரையும், ஆணையரையும் கண்டித்து வெளிநடப்பு செய்வோம்.