தன்கர் ராஜிநாமா: எதிர்க்கட்சிகள் கேள்வி

குடியரசு துணைத் தலைவர் பதவியிலிருந்து ஜகதீப் தன்கர் திடீரென ராஜிநாமா செய்தது குறித்து எதிர்க்கட்சிகள் கேள்வி எழுப்பியுள்ளன.

- 

புது தில்லி, ஜூலை 22:

இந்தியாவின் 14-ஆவது குடியரசு துணைத் தலைவராகப் பதவி வகித்து வந்த ஜகதீப் தன்கர் (74), நாடாளுமன்ற மழைக்கால கூட்டத்தொடரின் முதல் நாளில் (திங்கள்கிழமை), தனது பதவியை திடீரென ராஜிநாமா செய்தார். குடியரசுத் தலைவர் திரௌபதி முர்முக்கு அவர் அனுப்பிய ராஜிநாமா கடிதத்தில், 'மருத்துவர்களின் ஆலோசனையின்படி, உடல் நலனுக்கு முக்கியத்துவம் அளிப்பதற்காக குடியரசு துணைத்தலைவர் பதவியை ராஜிநாமா செய்கிறேன். இந்திய அரசமைப்புச் சட்டத்தின் 67(ஏ) பிரிவின்கீழ், உடனடியாக அமலுக்கு வரும் வகையில் இதை மேற்கொண்டுள்ளேன்' என்று குறிப்பிட்டார்.

அறிவிக்கை வெளியீடு: ஜகதீப் தன்கர் ராஜிநாமா தொடர்பான அறிவிக்கையை மத்திய உள்துறை அமைச்சகம் செவ்வாய்க்கிழமை வெளியிட்டது.

மத்திய உள்துறைச் செயலர் கோவிந்த் மோகன் கையொப்பமிட்ட அந்த அறிவிக்கையில், 'பொது தகவலுக்காக குடியரசு துணைத் தலைவரின் ராஜிநாமா குறித்த தகவல் வெளியிடப்படுகிறது' என்று குறிப்பிட்டு, அவரின் ராஜிநாமா கடிதம் இடம்பெற்றுள்ளது.

மாநிலங்களவையில் தகவல்: முன்னதாக, இந்த அறிவிக்கை குறித்து மாநிலங்களவையில்தகவல் தெரிவிக்கப்பட்டது. கேள்வி நேரத்துக்காக மாநிலங்களவை பகல் 12 மணிக்கு கூடியபோது, இந்த அறிவிக்கை குறித்து அவையை வழிநடத்திய கன்ஷியாம் திவாரி உறுப்பினர்களுக்குத் தெரிவித்தார்.

மாநிலங்களவையின் தலைவராகவும் குடியரசு துணைத் தலைவர் இருப்பதால், இந்த அறிவிக்கை குறித்த தகவல் முறைப்படி அவை யில் தெரிவிக்கப்பட்டது.