உசிலம்பட்டி தலைமைக் காவலர் கொலை வழக்கில் 3 பேர் கைது: துப்பாக்கிச்சூட்டில் ஒருவர் காயம்

மதுரை மாவட்டம், உசிலம்பட்டியில் தலைமைக் காவலரை கொலை செய்து விட்டு, கேரளத்துக்கு தப்பிச் செல்வதற்காக கம்பம் அருகே பதுங்கியிருந்த 3 பேரை தனிப்படை போலீஸார் சனிக்கிழமை கைது செய்தனர்.

- 

தேனி, மார்ச் 29: அப்போது, காவலரைத் தாக்கி விட்டு தப்பியோட முயன்ற ஒருவர், போலீஸார் துப்பாக்கிச்சூட்டில் காயமடைந்து மருத்துவமனையில் அனுமதிக்கப்பட்டார்.

உசிலம்பட்டி காவல் நிலைய தலைமைக் காவலர் கள்ளம்பட்டியைச் சேர்ந்த முத்துக்குமார் (36). இவர் உசிலம்பட்டி அருகே நாவார்பட்டியில் உள்ள தோப்பில் வியாழக்கிழமை நண்பருடன் சேர்ந்து மது அருந்திக்கொண்டிருந்தார். அப்போது, முத்துக்குமாருடன் ஒரு கும்பல் தகராறு செய்து, அவரைக் கல்லால் தாக்கி கொலை செய்து விட்டு தப்பியோடியது.

இந்தக் கும்பல் ஆண்டிபட்டி வட்டம், வருஷநாடு மலைப் பகுதியில் பதுங்கியிருப்பதாக கிடைத்த தகவலின் பேரில், மதுரை ஐ.ஜி. பிரேமானந்த் சின்ஹா தலைமையில் மதுரை, தேனி, சிவகங்கை, ராமநாதபுரம் போலீஸார் தனிப்படை அமைத்து தேடி வந்தனர்.