குடியரசு துணைத் தலைவராக சி.பி.ராதாகிருஷ்ணன் தேர்வு

குடியரசு துணைத் தலைவர் பதவிக்கு செவ்வாய்க்கிழமை நடைபெற்ற தேர்தலில் பாஜக தலைமையிலான ஆளும் தேசிய ஜனநாயக கூட்டணி சார்பில் போட்டியிட்ட சி.பி. ராதாகிருஷ்ணன் (67) 452 வாக்குகள் பெற்று வெற்றி பெற்றார்.

- 

புது தில்லி, செப். 9: 'இண்டி' கூட்டணி வேட்பாளர் சுதர்சன் ரெட்டி 300 வாக்குகள் பெற்ற நிலையில், அவரைவிட 152 வாக்குகள் கூடுதலாக சி.பி.ராதாகிருஷ்ணன் பெற்றார்.

நாடாளுமன்ற இரு அவைகளிலும் மொத்தம் உள்ள 788 எம்.பி.க்களில் தற்போதைய உறுப்பினர்கள் எண்ணிக்கை 781-ஆக உள்ள நிலையில், 767 எம்.பி.க்கள் தேர்தலில் பங்கேற்று வாக்கைப் பதிவு செய்தனர். பதிவானவற்றில் 752 வாக்குகள் செல்லத்தக்கவையாகவும், 15 வாக்குகள் செல்லாதவையாகவும் அறிவிக்கப்பட்டன.

இதில் சி.பி.ராதாகிருஷ்ணனுக்கு ஆதரவாக 452 வாக்குகள் பதிவாகின. எதிர்க்கட்சிகளின் 'இண்டி' கூட்டணி சார்பில் போட்டியிட்ட உச்சநீதிமன்ற ஓய்வு பெற்ற நீதிபதி பி.சுதர்சன் ரெட்டிக்கு ஆதரவாக 300 வாக்குகள் பதிவாகின.