தீ வைக்கப்பட்ட ஒடிசா சிறுமி: தில்லி எய்ம்ஸ் மருத்துவமனைக்கு மாற்றம்

ஒடிசாவின் புரி மாவட்டத்தில் அடையாளம் தெரியாத 3 நபர்களால் தீ வைத்து எரிக்கப்பட்ட சிறுமி, புவனேசுவரம் எய்ம்ஸ் மருத்துவமனையில் சிகிச்சை பெற்று வந்த நிலையில், மேம்பட்ட சிகிச்சைக்காக தில்லி எய்ம்ஸ் மருத்துவமனைக்கு ஞாயிற்றுக்கிழமை மாற்றப்பட்டார்.

- 

புவனேசுவரம், ஜூலை 20:

புரி மாவட்டம், பாலாங்கா காவல் நிலைய எல்லைக்குள்பட்ட பயாபார் கிராமம் அருகே பார்கவி ஆற்றங்கரையில் கடந்த சனிக்கிழமை காலை 9 மணியளவில் இந்தக் கொடூர சம்பவம் நிகழ்ந்தது.

தனது தோழியின் வீட்டிலிருந்து திரும்பி வந்து கொண்டிருந்த அப்பகுதியைச் சேர்ந்த 15 வயது சிறுமியை, இருசக்கர வாகனங்களில் வந்த 3 இளைஞர்கள் வழிமறித்தனர். அந்தச் சிறுமியை அவர்கள் வலுக்கட்டாயமாக ஆற்றங்கரைக்கு இழுத்துச் சென்று, அவரின் உடல் மீது எரிபொருளை ஊற்றி தீ வைத்து விட்டு, தப்பிச் சென்றனர்.