மக்காச்சோளத்துக்கு விவசாயிகளிடம் சந்தைக் கட்டணம் வசூல்

குறைதீர் கூட்டத்தில் புகார்

- 

திண்டுக்கல், பிப். 28: மக்காச்சோளத்துக்கு விவசாயிகளிடம் சந்தைக் கட்டணம் வசூலிப்பதைத் தடுக்க நடவடிக்கை எடுக்க வேண்டும் எனக் குறைதீர் கூட்டத்தில் வலியுறுத்தப்பட்டது.

திண்டுக்கல் மாவட்ட விவசாயிகளுக்கான குறைதீர் கூட்டம், மாவட்ட ஆட்சியர் அலுவலகத்தில் வெள்ளிக்கிழமை நடைபெற்றது. இந்தக் கூட்டத்துக்கு ஆட்சியர் செ.சரவணன் தலைமை வகித்தார். வேளாண்மை இணை இயக்குநர் அ.பாண்டியன் முன்னிலை வகித்தார்.

கூட்டத்தில் நடைபெற்ற விவாதங்கள்:

தாதன்குளத்தை ஆழப்படுத்த வலியுறுத்தல்: திண்டுக்கல்லை அடுத்த குட்டத்துப்பட்டி தாதன்குளத்தில் 100 நாள் வேலைத்திட்டத்தின் கீழ், மேற்கொள்ளப்படும் பணிகளால் பயன் கிடைக்காது. இதனால், இயந்திரங்கள் மூலம் தூர்வாரி, மதகுகள் கட்டிக் கொடுத்தால், மீண்டும் விவசாயப் பணிகள் நடைபெறுவதற்கு வாய்ப்பு ஏற்படும் என விவசாயிகள் சங்க நிர்வாகி நாகராஜன் தெரிவித்தார்.

ஆட்சியர்: ரெட்டியார்சத்திரம் ஊராட்சி ஒன்றிய அலுவலகம் மூலம் உரிய நடவடிக்கை எடுக்கப்படும் என்றார்.

காட்டு மாடுகளால் பயிர்கள் சேதம்: தொப்பையசாமி மலை அடிவாரத்தில், ஆர்.கோம்பை சுற்றுப்புறப்பகுதிகளில் காட்டுமாடுகளால் விவசாயப் பயிர்கள் சேதமடைந்து வருகின்றன. காட்டு மாடுகளுக்கான குடிநீர் வசதியை, மலையடிவாரத்தில் ஏற்படுத்திக் கொடுத்தால், இந்த பிரச்னைக்குத் தீர்வு காண முடியும் என விவசாயி எஸ்.முத்துச்சாமி கோரிக்கை விடுத்தார்.