தமிழகத்தில் ஏப்.23-இல் பேரவைத் தேர்தல்

மே 4-இல் வாக்கு எண்ணிக்கை. புதுச்சேரி, கேரளம், மேற்கு வங்கம், அஸ்ஸாம் தேர்தல் தேதி அறிவிப்பு

- நமது நிருபர்

தினசரி ஞாயிற்றுக்கிழமை தேர்தல் அறிவிப்பை வெளியிட்ட தேசிய தலைமை தேர்தல் ஆணையர் ஞானேஷ் குமார். உடன் (இடமிருந்து) தேர்தல் ஆணையர்கள் சிக் சிங் சாந்து, விவேக் ஜோஷி.

தமிழகம், கேரளம் உள்பட 4 மாநிலங்கள், புதுச்சேரி யூனியன் பிரதேசத்துக்கான சட்டப்பேரவைத் தேர்தல் தேதியை இந்திய தேர்தல் ஆணையம் ஞாயிற்றுக்கிழமை அறிவித்தது. அதன்படி, தமிழகத்தில் ஏப்ரல் 23-ஆம் தேதி ஒரே கட்டமாகத் தேர்தல் நடைபெறுகிறது.

புதுச்சேரி யூனியன் பிரதேசம், கேரளம், அஸ்ஸாம் மாநிலங்களுக்கும் ஏப்ரல் 9-ஆம் தேதி ஒரே கட்டமாகத் தேர்தல் நடைபெறுகிறது. மேற்கு வங்கத்தில் இரு கட்டங்களாக ஏப்ரல் 23 மற்றும் ஏப்ரல் 29 ஆகிய தேதிகளில் வாக்குப்பதிவு நடைபெறுகிறது. பேரவை தேர்தல்களில் பதிவாகும் வாக்குகளின் எண்ணிக்கை மே 4-ஆம் தேதி நடைபெற உள்ளது.

இதற்கான அறிவிப்பை இந்திய தலைமைத் தேர்தல் ஆணையர் ஞானேஷ் குமார் தில்லியில் ஞாயிற்றுக்கிழமை நடைபெற்ற செய்தியாளர்கள் சந்திப்பில் வெளியிட்டார். அப்போது, தேர்தல் ஆணையர்கள் சுக்பிர் சிங் சாந்து, விவேக் ஜோஷி உள்ளிட்டோர் உடனிருந்தனர்.

சட்டப்பேரவை தேர்தல் தேதி அறிவிக்கப்பட்டதைத் தொடர்ந்து, தேர்தல் நடைபெறும் மாநிலங்கள் மற்றும் யூனியன் பிரதேசத்தில் தேர்தல் நடத்தை விதிகள் உடனடியாக அமலுக்கு வருவதாக தலைமைத் தேர்தல் ஆணையர் தெரிவித்தார். இதையடுத்து, ரொக்கமாக ரூ.50,000-க்கு மேல் கொண்டு சென்றால் உரிய ஆவணங்கள் கட்டாயம் என்பது உள்ளிட்ட விதிகள் அமல்படுத்தப்பட்டுள்ளன.