கர்நாடகத்தில் ‘தக் லைஃப்’ படத்தை வெளியிடவிடாமல் தடுப்பவர்கள் மீது நடவடிக்கை

உச்சநீதிமன்றம் உத்தரவு

- நமது சிறப்பு நிருபர்

நமது சிறப்பு நிருபர் புது தில்லி, ஜூன் 19: கர்நாடகத்தில் ‘தக் லைஃப்’ படத்தைத் திரையரங்குகளில் வெளியிடவிடாமல் தடுப்பவர்கள் மீது நடவடிக்கை எடுக்க வேண்டும் என்று உச்சநீதிமன்றம் வியாழக்கிழமை உத்தரவிட்டது.

‘ஒருவரின் உணர்வுகளைப் புண்படுத்தியதற்காக, திரைப்படம், நகைச்சுவை அல்லது ஸ்டாண்ட்-அப் காமெடி போன்றவற்றை நிறுத்த முடியாது. அவற்றை சட்டப்படி எதிர்கொள்ள வழிமுறைகள் உள்ளன’ என்றும் உச்சநீதிமன்றம் கூறியது.

கமல்ஹாசன் நடித்த தக் லைஃப் படத்தை கர்நாடகத்தில் திரையிட எதிர்ப்பு வலுப்பது தொடர்பாக எம். மகேஷ் ரெட்டி என்பவர் உச்சநீதிமன்றத்தில் தாக்கல் செய்த மனுவை அதன் விடுமுறை கால சிறப்பு அமர்வு நீதிபதிகள் உஜ்ஜல் புயான், மன்மோகன் விசாரித்து வருகின்றனர்.

இந்த விவகாரத்தில் வியாழக்கிழமை நடைபெற்ற விசாரணையின்போது, மனுதாரர் சார்பில் வழக்குரைஞர் ஏ. வேலன், கன்னட சாகித்திய பரிஷத் அமைப்பின் சார்பில் மூத்த வழக்குரைஞர் சஞ்சய் நூலி, கர்நாடக திரைப்பட வர்த்தக சபை, படத் தயாரிப்பு நிறுவனங்களில் ஒன்றான நடிகர் கமல்ஹாசனின் ராஜ்கமல் ஃபிலிம் இன்டர்நேஷனல் ஆகியவற்றின் வழக்குரைஞர்கள் ஆஜராகி வாதங்களை முன்வைத்தனர்.