சாத்தூர் அருகே பட்டாசு ஆலையில் வெடி விபத்து: 8 பேர் உயிரிழப்பு

விருதுநகர் மாவட்டம், சாத்தூர் அருகே பட்டாசு ஆலையில் செவ்வாய்க்கிழமை நேரிட்ட வெடி விபத்தில் 8 பேர் உயிரிழந்தனர். 5 பேர் பலத்த காயமடைந்தனர்.

- 

சாத்தூர், ஜூலை 1:

சாத்தூர் அருகேயுள்ள சின்னக்காமன்பட்டியில் சிவகாசியைச் சேர்ந்த கமல்குமார் (55) என்பவருக்குச் சொந்தமான பட்டாசு ஆலை இயங்கி வருகிறது. இந்த ஆலையில், 30-க்கும் மேற்பட்ட அறைகளில் நூற்றுக்கும் அதிகமான தொழிலாளர்கள் பணிபுரிகின்றனர்.

இந்த ஆலையில் செவ்வாய்க்கிழமை காலை பட்டாசுக்குத் தேவையான மருந்துகள் கலக்கும் போது உராய்வு காரணமாக, ஓர் அறையில் பட்டாசுகள் வெடித்துச் சிதறின.

இதைத் தொடர்ந்து, அடுத்தடுத்த அறைகளுக்கும் தீ பரவி பட்டாசு கள் வெடித்துச் சிதறின. இந்த விபத்தில் 7 அறைகள் இடிந்து தரைமட்டமாகின. இந்த வெடி சப்தம் சுமார் 6 கி.மீ. தொலைவு வரை கேட்டதாக அந்தப் பகுதி மக்கள் தெரிவித்தனர்.

தகவலறிந்த சிவகாசி தீயணைப்பு, மீட்புப் படை வீரர்கள் விரைந்து வந்து தீயை அணைக்கும் பணியில் ஈடுபட்டனர்.