தேசிய மக்கள் நீதிமன்றம்: 2,992 வழக்குகளுக்குத் தீர்வு

திருப்பூர் மாவட்டத்தில் உள்ள நீதிமன்றங்களில் சனிக்கிழமை நடைபெற்ற தேசிய மக்கள் நீதிமன்றத்தில் ரூ.65.16 கோடி மதிப்பீட்டில் 2,992 வழக்குகளுக்கு சமரசத் தீர்வு காணப்பட்டது.

- 

திருப்பூர், மார்ச் 8: திருப்பூர் மாவட்டத்தில் உள்ள நீதிமன்றங்களில் சனிக்கிழமை நடைபெற்ற தேசிய மக்கள் நீதிமன்றத்தில் ரூ.65.16 கோடி மதிப்பீட்டில் 2,992 வழக்குகளுக்கு சமரசத் தீர்வு காணப்பட்டது.

தேசிய மற்றும் தமிழ்நாடு மாநில சட்டப்பணிகள் ஆணைக் குழுவின் உத்தரவின்பேரில் முதன்மை மாவட்ட நீதிபதியும், திருப்பூர் மாவட்ட சட்டப் பணிகள் ஆணைக் குழுவின் தலைவருமான என்.குணசேகரன் தலைமையில் மாவட்டம் முழுவதும் உள்ள நீதிமன்றங்களில் தேசிய மக்கள் நீதிமன்றம் நடைபெற்றது.

மொத்தம் 20 அமர்வுகளாக நடைபெற்ற இந்த தேசிய மக்கள் நீதிமன்றத்தில், மோட்டார் வாகன விபத்து வழக்குகள், சிவில் வழக்குகள், குடும்ப நல வழக்குகள், சமரசத்துக்குரிய குற்ற வழக்குகள், காசோலை மோசடி வழக்குகள், வங்கி வாராக்கடன் வழக்குகள் என மொத்தம் 7,419 வழக்குகள் விசாரணைக்கு எடுத்துக்கொள்ளப்பட்டன.