மகாராஷ்டிரம் போன்று பிகாரில் தேர்தல் முறைகேட்டை அனுமதிக்கமாட்டோம்

'மகாராஷ்டிர சட்டப் பேரவைத் தேர்தலில் பாஜகவுக்கு சாதகமாக தேர்தல் முறைகேடு நடைபெற்றது; பிகார் தேர்தலிலும் இதைத் தொடர மத்திய பாஜக கூட்டணி அரசு முயற்சிக்கிறது. நாங்கள் அதை அனுமதிக்க மாட்டோம்' என்று மக்களவை எதிர்க்கட்சித் தலைவர் ராகுல் காந்தி கூறினார்.

- ராகுல் காந்தி

பாட்னா, ஜூலை 9:

மத்திய தொழிற்சங்கத்தினரால் அழைப்பு விடுக்கப்பட்ட நாடு தழுவிய பொது வேலைநிறுத்தம் புதன் கிழமை நடைபெற்றது. பிகாரில் கூடுதலாக வாக்காளர் பட்டியல் திருத்தப் பிரச்னையுடன் சேர்த்து மாநிலம் தழுவிய போராட்டங்களை 'இண்டி' கூட்டணிக் கட்சிகள் நடத்தின.

பிகார் தலைநகர் பாட்னாவில் தேர்தல் ஆணைய அலுவலகம் நோக்கி நடைபெற்ற ஆர்ப்பாட்ட பேரணியில் ராகுல் காந்தி, ராஷ்ட்ரீய ஜனதா தளத்தின் தேஜஸ்வி யாதவ், மார்க்சிஸ்ட் கம்யூனிஸ்ட் பொதுச் செயலர் எம்.ஏ.பேபி, இந்திய கம்யூனிஸ்ட் பொதுச் செயலர் டி.ராஜா உள்ளிட்ட எதிர்க்கட்சித் தலைவர்கள் பங்கேற்றனர்.