அரசுப் போக்குவரத்துக் கழக ஊழியர்களுக்கு 6% ஊதிய உயர்வு

தமிழக அரசுப் போக்குவரத்துக் கழக ஊழியர்களுக்கு அடிப்படை ஊதியத்தில் 6 சதவீதம் ஊதிய உயர்வு நிர்ணயம் செய்யப்பட்டுள்ளதாக தமிழக போக்குவரத்துத் துறை தெரிவித்துள்ளது.

- 

சென்னை, மே 29:

ஊதிய உயர்வு மூலம் குறைந்தபட்சம் ரூ.1,420 முதல் அதிகபட்சம் ரூ.6,460 வரை பணப் பலன்கள் கிடைக்க வழிவகை செய்யப்பட்டுள்ளது.

தமிழக அரசுப் போக்குவரத்துக் கழகங்களில் சுமார் 1.9 லட்சம் பேர் பணியாற்றி வருகின்றனர். இவர்களுக்கான 15-ஆவது ஊதிய ஒப்பந்தம் தொடர்பான மூன்றாம் கட்டப் பேச்சுவார்த்தை போக்குவரத்து மற்றும் மின்சாரத் துறை அமைச்சர் சா.சி.சிவசங்கர் தலைமையில் சென்னையில் வியாழக்கிழமை நடைபெற்றது.

இதில் தொழிலாளர் முன்னேற்றச் சங்கப் பேரவை, அண்ணா தொழிற்சங்கப் பேரவை, தமிழ்நாடு அரசுப் போக்குவரத்து ஊழியர் சம்மேளனம் (சிஐடியூ) உள்பட மொத்தம் 85 சங்கங்களின் பிரதிநிதிகள் கலந்துகொண்டனர்.

காலை 11 மணிக்கு தொடங்கிய பேச்சுவார்த்தை இரவு 9 மணி வரை நீடித்தது. இதில் உடன்பாடு எட்டப்பட்டு, 15-ஆவது ஊதிய ஒப்பந்தம் இறுதி செய்யப்பட்டது.