மணிப்பூரில் ஆட்சி அமைக்க பாஜக முயற்சி

குடியரசுத் தலைவர் ஆட்சி அமலில் உள்ள மணிப்பூரில் மீண்டும் ஆட்சி அமைக்க பாஜக முயற்சித்து வருகிறது.

- 

இம்பால், மே 28: புதிய அரசமைக்க 44 எம்எல்ஏக்களின் ஆதரவு உள்ளதாக ஆளுநர் அஜய்குமார் பல்லாவை புதன்கிழமை சந்தித்த பாஜக எம்எல்ஏ தோக்சோம் ராதேஷாம் சிங் தெரிவித்தார்.

மணிப்பூரில் பெரும்பான்மையினராக மைதேயி சமூகத்தினரும், சிறுபான்மையினராக குகி-ஜோ சமூகத்தினரும் உள்ளனர். இதில், மைதேயி சமூகத்தினருக்கு பழங்குடியினர் அந்தஸ்து வழங்கும் விவகாரத்தில் கடந்த 2023-ஆம் ஆண்டு மே மாதம் இன மோதல் ஏற்பட்டது.

தொடர் வன்முறையில் 250-க்கும் மேற்பட்டோர் கொல்லப்பட்டனர். ஆயிரக்கணக்கானோர் வீடுகளை இழந்து முகாம்களில் தங்க வைக்கப்பட்டுள்ளனர். இனக் கலவரத்தைக் கட்டுப்படுத்தத் தவறியதாக பாஜக முதல்வர் பிரேன் சிங் கடந்த பிப்ரவரியில் ராஜிநாமா செய்தார். இதையடுத்து, குடியரசுத் தலைவர் ஆட்சி அமலில்படுத்தப்பட்டது.

ஆலோசனை: கடந்த மே 20-ஆம் தேதி மைதேயினர் வாழும் பகுதியில் சென்ற பாதுகாப்புப் படையினரின் வாகனத்தில் மணிப்பூர் மாநில பெயர் மறைக்கப்பட்டிருந்ததாக கூறப்படுகிறது. இதற்கு ஆளுநர் மன்னிப்பு கோர வேண்டும் என்று வலியுறுத்தி மைதேயி சமூகத்தினர் போராட்டத்தில் ஈடுபட்டு வருகின்றனர்.

இந்நிலையில், மாநில சட்டம் ஒழுங்கு பிரச்னை குறித்து 10 எம்எல்ஏக்களுடன் ஆளுநர் அஜய் குமார் பல்லா புதன்கிழமை ஆலோசனை நடத்தினார். பின்னர் ஆளுநர் மாளிகை வெளியிட்ட செய்திக்குறிப்பில், ‘மாநிலத்தில் அமைதியை நிலை நாட்டவும், பாதுகாப்பைப் பலப்படுத்தவும் விரைவில் புதிய அரசு அமைக்கப்பட வேண்டும் என்று அவர்கள் வலியுறுத்தினர்’ என்று தெரிவிக்கப்பட்டது.