நாட்டை உலுக்கிய போலி மருந்து மோசடி வழக்கு அரசியல் பிரமுகர்கள் உள்பட 60 பேர் பட்டியல் தயாரிப்பு

சிபிஐயிடம் ஒப்படைக்க புதுவை போலீசார் முடிவு ஓரிரு நாளில் விசாரணையை துவங்கும் அதிகாரிகள்

- 

நாட்டை உலுக்கிய போலி மருந்து வழக்கு சிபிஐக்கு மாற்றப்பட்ட நிலையில் அரசியல் பிரமுகர்கள் உள்பட மேலும் 60 பேர் கொண்ட பட்டியலை தயாரித்துள்ள புதுச்சேரி போலீசார், அவற்றை சிபிஐ வசம் ஒப்படைக்க முடிவு செய்துள்ளனர். விரைவில் புதுச்சேரி வரும் சிபிஐ அதிகாரிகள் இவ்வழக்கு விசாரணையை துவங்க உள்ளதால் அரசியல் புள்ளிகள், அதிகாரிகள் கலக்கத்தில் உள்ளனர்.

புதுச்சேரியில் போலி மருந்துகள் தயாரிக்கப்பட்டு அவை நாடு முழுவதும் விற்பனை செய்யப்பட்ட சம்பவம் அதிர்ச்சியை ஏற்படுத்தியது. சுமார் ரூ.2,000 கோடி அளவுக்கு மோசடி நடந்துள்ளதாக கூறப்படுகிறது. இது தொடர்பாக சிபிசிஐடிக்கு வந்த புகார்களின் அடிப்படையில் இன்ஸ்பெக்டர் பாபுஜி தலைமையிலான போலீசார் தொடர்ந்து விசாரணை நடத்தி கைது நடவடிக்கை மேற்கொண்டு வருகின்றனர்.

முக்கிய குற்றவாளியான போலி மருந்து தொழிற்சாலை நடத்திய ராஜா, மாஜி ஐஎப்எஸ் அதிகாரி சத்தியமூர்த்தி, முக்கிய பங்குதாரரான என்ஆர் காங்கிரஸ் நிர்வாகி மணிகண்டன் உள்ளிட்ட 24 பேர் கைதாகினர். மருந்து கட்டுப்பாட்டுத் துறை அதிகாரிகளும் போலி மருந்துகளை தயாரித்த நிறுவனங்கள், குடோன்களில் ஆய்வு நடத்தி 13 இடங்களுக்கு சீல் வைத்தனர்.