பீகாரில் 2 கட்டமாக சட்டப்பேரவை தேர்தல்

நவம்பர் 14ம் தேதி வாக்கு எண்ணிக்கை; தேர்தல் ஆணையம் அறிவிப்பு

- 

பீகார் சட்டப்பேரவை தேர்தல் தேதிகளை தலைமை தேர்தல் ஆணையர் ஞானேஷ் குமார் நேற்று அறிவித்தார். 243 தொகுதிகளுக்கு வரும் நவம்பர் 6 மற்றும் 11ம் தேதிகளில் 2 கட்டமாக தேர்தல் நடத்தப்பட உள்ளது. வரும் 14ம் தேதி வாக்குகள் எண்ணப்பட்டு தேர்தல் முடிவு அறிவிக்கப்படும்.

நவம்பர் 6, 11ம் தேதிகளில் வாக்குப்பதிவு

பீகார் மாநிலத்தில் ஐக்கிய ஜனதா தளம் - பாஜ கூட்டணி ஆட்சி நடந்து வருகிறது. முதல்வராக ஐக்கிய ஜனதா தள (ஜேடியு) தலைவர் நிதிஷ்குமார் பதவி வகிக்கிறார். எதிர்க்கட்சி தலைவராக ராஷ்டிரிய ஜனதா தளத்தின் (ஆர்ஜேடி) தேஜஸ்வி யாதவ் உள்ளார். தற்போதைய சட்டப்பேரவையின் பதவிக்காலம் வரும் நவம்பர் 22ம் தேதியுடன் முடிவடைகிறது. இதற்கு முன்பாக தேர்தலை நடத்தி முடிக்க தேர்தல் ஆணையம் கடந்த ஜூன் மாதம் ஆயத்த பணிகளை தொடங்கியது.

வேறெந்த மாநிலத்திலும் இல்லாத வகையில், 22 ஆண்டுகளுக்குப் பிறகு பீகாரில் வாக்காளர் பட்டியல் சிறப்பு தீவிர திருத்த பணிகள் கடந்த ஜூன் 24ம் தேதி தொடங்கப்பட்டது. இதற்கு எதிர்க்கட்சிகள் கடும் எதிர்ப்பு தெரிவித்தன. சிறப்பு தீவிர திருத்தம் என்ற பெயரில் வாக்குகளை திருடும் பாஜவின் திட்டத்திற்கு தேர்தல் ஆணையம் உதவுவதாக மக்களவை எதிர்க்கட்சி தலைவர் ராகுல் காந்தி குற்றம்சாட்டினார். மேலும், சிறப்பு தீவிர திருத்தத்திற்கு எதிராக பீகாரில் அவர் யாத்திரை மேற்கொண்டார்.