தொண்டர் தம் பெருமை பாடிய தெய்வ சேக்கிழார்

அவ்வையாரிடம் முருகப் பெருமான் எது பெரியது என்று கேட்க, அவ்வை மிக அழகாகப் பதில் சொல்கிறார்.

- 

"முருகப் பெருமானே. நீ பெரியது எது என்று எளிதாகக் கேட்டுவிட்டாய். விடை சட்டென்று சொல்ல முடியாது. ஆராய்ந்து சொல்கிறேன். பூமிதான் பெரியது என்று சொல்லலாம். ஆனால் பூமியை படைத்தது நான்முகன் அல்லவா! அதனால் நான்முகன் பெரியவன் என்று சொல்லலாம். ஆனால் நான்முகன் திருமால் உந்தியில் உதித்தவர். அதனால் திருமால் பெரியவர் என்று ஒரு முடிவுக்கு வரலாம் என்றால் அவர் பாற்கடலில் பள்ளிக் கொண்டிருக்கிறார். சரி; பாற்கடல் பெரியது என்று சொல்லலாம் என்று பார்த்தால், அந்தக் கடலை அகத்தியர் ஒரு கலசத்தில் அடைத்து விட்டார். அந்தக் கலசம் இந்த பூமியில் உள்ள சிறிய அளவு மண்ணால் செய்யப்பட்டது. இந்தப் பூமி ஆதிசேஷன் என்கின்ற பாம்பின் ஒரு தலைமீது இருக்கும் சிறிய பகுதி. சரி பாம்புதான் பெரியது என்று பார்த்தால், அதை உமாதேவி தன் கைவிரல் மோதிரமாக அணிந்திருக்கிறார். சரி உமாதேவி தான் பெரியவர் என்று சொல்லலாம். ஆனால், அவள் சிவபெருமானின் உடலில் பாதியாக இருக்கின்றார் . அப்படியானால் சிவபெருமான் தான் பெரியவர் என்று ஒரு முடிவுக்கு வரலாம் என்று சொன்னால், அவர் சிவனடியார்களின் உள்ளத்தில் ஒடுங்கி இருக்கின்றார். எனவே பெரியவனான சிவபெருமானை, உள்ளத்தில் ஒடுக்கிய தொண்டர்கள் தான் பெரியவர்கள் என்று மிகப்பெரிய ஆய்வு செய்து அவ்வையார் ஒரு பாடலாக தன் முடிவைத் தந்திருக்கிறார்.