அதிமுக-பாஜக கூட்டணி அமலாக்கத்துறையை ஏவி விட்டு நடத்தும் அவதூறு பிரசாரத்தை சட்டப்படி எதிர்கொள்வேன்

தமிழக நகராட்சி நிர்வாகம் மற்றும் குடிநீர் வழங்கல் துறையில் பணி நியமனம் மற்றும் ஒப்பந்தம் விட்டது தொடர்பாக ரூ.

- 

1020 கோடி வரை முறைகேடு நடந்துள்ளதாகவும், எனவே அமைச்சர் கே. என். நேரு மீது வழக்கு பதிவு செய்து நடவடிக்கை எடுக்க தமிழக தலைமை செயலாளர் மற்றும் காவல் துறை டிஜிபிக்கு அமலாக்கத்துறை சார்பில் 288 பக்க ஆவணங்களுடன் 2வது முறையாக கடிதம் அனுப்பப்பட்டுள்ளது.இதுதொடர்பாக தமிழ்நாடு நகராட்சி மற்றும் குடிநீர் வழங்கல் துறை அமைச்சர் கே.என் நேரு நேற்று வெளியிட்ட அறிக்கை:

ஒவ்வொரு துறையிலும் திராவிட மாடல் அரசின் சாதனைகளை பொறுத்துக் கொள்ள முடியாத எதிர்கட்சிகளின் வரிசையில் அமலாக்கத்துறையையும் சேர்த்து கொண்டு-அதை ஒன்றிய பாஜ அரசின் ஏவல் துறையாக்கி - நாளொரு புகாரும், பொழுதொரு பிரசாரமுமாக என்னை குறி வைத்து தொடர்ந்து அவதூறில் ஈடுபட்டு வருவது மிகுந்த கண்டனத்திற்குரியது. கடந்த ஐந்து வருடங்களில் எனது துறையின் கீழ் 24 ஆயிரத்து 752 கிலோ மீட்டர் சாலைகள் போடப்பட்டுள்ளன. கிராமப்புற மக்களின் குடிநீர் தேவையை பூர்த்தி செய்யும் வகையில் தமிழ்நாடு குடிநீர் வடிகால் வாரியத்தின் மூலம் 1 கோடியே 22 லட்சத்திற்கும் மேற்பட்டோருக்கு பாதுகாக்கப்பட்ட குடிநீர் வழங்கும் திட்டங்கள் செயல்படுத்தப்பட்டுள்ளன. இன்னும் 77 லட்சத்து 28 ஆயிரத்திற்கும் மேற்பட்ட மக்களுக்கு பாதுகாப்பு திட்டங்கள் வடிவமைக்கப்பட்டு பணிகள் தீவிரமாக நடந்து வருகின்றன.

மாநகராட்சி, நகராட்சி, பேரூராட்சிகள் என இதுவரை 1762 பூங்காக்கள் அமைக்கப்பட்டுள்ளது. அதில் ஒன்று சமீபத்தில் முதல்வரால் திறந்து வைக்கப்பட்ட கோவை செம்மொழிப் பூங்கா.