Cynhesu at yr Almaenwyr

TRA ar wyliau yn yr Almaen, rhwng dwy ddinas enwog, cawsom fentro i fan dieithr.

- Angharad Tomos

Mae enwau Dresden a Berlin yn gybyddus i bawb, ond Bad Schandau - lle ar y ddaear oedd fanno? Dwi wedi dysgu bellach i ymddiried yn fy ngŵr i drefnu gwyliau. Mae o wedi gwneud ei ymchwil, yn wahanol i fi a'r mab.

Rhyw dri chwarter awr o daith drên o Dresden yw Bad Schandau, ar y ffin efo gwlad Tsiec. Mae trefi ar y ffin wastad yn ddiddorol. Wedi cyrraedd yr orsaf, roedd rhaid croesi'r afon Elbe mewn cwch. Dyna pryd y gwelsom y creigiau, mae'r dref wedi ei lleoli mewn dyffryn dwfn, a'r creigiau rhyfeddol i'w gweld uwchlaw. Yn Oriel yr Albertinum yn Dresden, dotiais at dirluniau Caspar David Friedrich (1819). Bad Schandau oedd ei ardal o, neu'r 'Swistr Sacsonaidd, ac roedd wedi ei darlunio yn helaeth. Mae'r ardal hefyd o fewn Parc Cenedlaethol.

Ar galan Mai y clywais y gôg yn Bad Schandau, a thaswn i'n fardd, byddwn yn cyfansoddi cerdd am y lle. Wedi bod yn cerdded palmentydd caled am wythnos yn Dresden, roedd yn braf cael gwair dan draed a chysgod coed rhag yr haul. Y broblem oedd, sut ron i am gyrraedd uchelderau'r mynyddoedd? Doedd dim amdani ond codi'n blygeiniol i osgoi'r lluoedd, a chyrraedd gwaelod mynydd Bastei am naw. Chwarae teg, roedd yna risiau yr holl ffordd, ond wedi dros hanner awr o ddringo grisiau, ron i wedi hen ddiffygio.