டிரம்ப் ஏவும் வரி ஆயுதம்...

வரி, வட்டி, திரை கிஸ்தி யாவுமே அதிகார மையங்களின் ஆயுதங்கள் தாம். மக்களின் வாழ்வாதாரத்தை உயர்த்தவோ தங்கள் வாழ்க்கை தரத்தை உயர்த்திக் கொள்ளவோ வரி விதிப்பது அரசாங்கத்தின் உரிமையாக உள்ளது. மக்கள் வாங்கும் பொருள்களுக்கு மட்டுமல்ல வெளிநாட்டிலிருந்து வரும் பொருள்களுக்கும் வரி விதிப்பது ஒவ்வொரு நாட்டு அரசின் கடமையாக இருக்கிறது. அது பொருளின் தேவை மற்றும் வழங்கல் அடிப்படையில் தீர்மானிக்கப்படுவது இயல்பு. அதற்கு மாறாக மனதுக்கு வந்தபடி வரிகளை விதிக்கும் கொடுமை அமெரிக்காவில் நடக்கிறது. வணிக யுத்தத்தில் வரியை ஆயுதம் ஆக்கி மற்ற நாடுகளை வதைக்கும் செயலை அமெரிக்க அதிபர் டிரம்ப் செய்து வருகிறார்.

- 

இறக்குமதி செய்யப்படும் பொருளின் தன்மைக்கு ஏற்ப வரி விதிப்பது மரபு. ஆனால் டிரம்போ, இறக்குமதி செய்யும் நாட்டின் நட்புறவுக்கு ஏற்ப வரி விதிக்கிறார்.

சமீபத்தில், பிரேசில் நாட்டுக்கு 50% வரி விதிப்பதாகவும், அல்ஜீரியா, ஈராக், லிபியா மற்றும் இலங்கைக்கு 30% வரியும், புருனே, மால்டோவா நாடுகள் மீது 25% வரியும், பிலிப்பைன்ஸ் நாட்டுக்கு 20% வரியும் விதிக்கப்படுவதாக அறிவித்தார். அமெரிக்க ஆதரவாளரான, பிரேசில் நாட்டின் முன்னாள் அதிபர் ஜெய்ர் போல்சனாரோ மீது வழக்குத் தொடரப்பட்டதற்கு பதிலடியாகவே அந்நாட்டின் மீது 50% வரி விதிக்கப்பட்டதாக அமெரிக்கா தரப்பில் தெரிவிக்கப்பட்டது.