தமிழக முதலமைச்சர் மு.க.ஸ்டாலின் பிரதமர் மோடியிடம் வழங்கிய மனு முழு விவரம்

நிதி ஆயோக் கூட்டத்தில் கலந்து கொண்ட தமிழ்நாடு முதலமைச்சர் மு.க.ஸ்டாலின் அவர்கள், இந்தியப் பிரதமர் நரேந்திர மோடியை சந்தித்து, தமிழ்நாட்டின் வளர்ச்சித் திட்டங்கள் குறித்த பல்வேறு கோரிக்கைகள் அடங்கிய மனுவை வழங்கினார்.

- 

தமிழ்நாட்டின் உட்கட்டமைப்பு மேம்பாட்டுத் திட்டங்களான - கோயம்புத்தூர் மற்றும் மதுரை மெட்ரோ இரயில் திட்டங்களுக்கு ஒப்புதல், சென்னையின் பெருந்திரள் துரித போக்குவரத்து அமைப்பினை (MRTS) சென்னை மெட்ரோ இரயில் நிறுவனம் வசம் ஒப்படைத்தல், தேசிய நெடுஞ்சாலையின் (NH32) செங்கல்பட்டு - திண்டிவனம் பகுதியை ஆறு/எட்டு வழிச்சாலையாக மேம்படுத்துதல், கோயம்புத்தூர் மற்றும் மதுரை விமான நிலையங்கள் விரிவாக்கம், கோயம்புத்தூரில் புதிய எய்ம்ஸ் மருத்துவமனை அமைப்பது தொடர்பாகவும்;

சமக்ர சிக்ஷா திட்டத்திற்கான நிதி விடுவிப்பு குறித்தும், ஆதிதிராவிடர் மற்றும் பழங்குடியினர் சாதி பட்டியலில் "N" மற்றும் "A" என முடிவடையும் பெயர்களை "R" என மாற்றக் கோரியும், ஆதிதிராவிடர் பட்டியலில், கிறித்துவ மதம் மாறிய ஆதி திராவிடர்களை சேர்ப்பது குறித்தும், ஆதிதிராவிடர் பட்டியலில், கிறித்துவ மதம் மாறிய ஆதி திராவிடர்களை சேர்ப்பது குறித்தும்,

இந்திய மீனவர்களின் பாரம்பரிய மீன்பிடி உரிமைகளைப் பாதுகாப்பதற்கும், கைது செய்யப்பட்ட மீனவர்கள் மற்றும் அவர்களின் படகுகளை விரைவாக விடுவித்து இப்பிரச்சனைகளுக்கு நிரந்தரத் தீர்வு காண்பது குறித்தும் கோரிக்கை மனு அளித்தார்.

அதன் விவரங்கள் பின்வருமாறு:

1. தமிழ்நாட்டின் உட்கட்டமைப்பு மேம்பாட்டுத் திட்டங்கள்

கோயம்புத்தூர் மற்றும் மதுரை மெட்ரோ இரயில் திட்டங்களுக்கு ஒப்புதல்.

தென்னிந்தியாவின் மான்செஸ்டர் என்று அழைக்கப்படும் கோயம்புத்தூர் நகரம், கலை பண்பாட்டிற்கு தலைநகராக விளங்கும் மதுரை ஆகிய இரு நகரங்களின் வளர்ச்சி மற்றும் மேம்பாட்டிற்கேற்ப, செயல்திறன்மிக்க பொது போக்குவரத்து அமைப்புகளை உருவாக்குவது அவசியமாகிறது. இதன் அடிப்படையில், மெட்ரோ இரயில் திட்டத்தினை அறிமுகப்படுத்த தமிழ்நாடு அரசு உத்தேசித்துள்ளது. சென்னை மெட்ரோ இரயில் நிறுவனம் கோயம்புத்தூர் மற்றும் மதுரையில் மெட்ரோ இரயில் திட்டத்தினை செயல்படுத்துவதற்கான விரிவான திட்ட அறிக்கைகளை (DPRs) தயாரித்துள்ளது.