SHAABAA Season 28 Batch 2018 mikumpleto og 7-0 sweep sa eliminasyon

Ang Xchange Forex Batch 2018 midemolis sa Imperial House of Furniture Batch 2015, 85-67, aron pagkumpleto og 7-0 sweep sa eliminasyon sa Division C sa Sacred Heart Ateneo Alumni Basketball Athletic Association (SHAABAA) Season 28 niadtong Domingo, Hulyo 6, didto sa SHS-Ateneo de Cebu Magis Eagles Arena sa Barangay Canduman, dakbayan sa Mandaue.

- 

Si Xavier Tarriman mibulsa og 18 puntos uban ang siyam ka rebounds, usa ka assist ug usa ka block samtang si Benedict Andre Chua midugang og 16 puntos, lima ka rebounds, tulo ka assists, duha ka steals ug usa ka block aron pangulohan ang Batch 2018 ngadto sa 18 puntos nga paglampaso sa Batch 2015.

Hapit maka-triple double si Patrick Wilson Yu nga mipupo og 15 puntos, 13 ka rebunds ug walo ka assists samtang si Eroll Pastor miamot og 12 puntos ug upat ka rebounds alang sa Batch 2018.