సింహ వాహనంపై యోగ నరసింహుడిగా కల్యాణ వెంకన్న

చంద్రగిరి మండలంలోని శ్రీనివాసమంగా పురంలో వెలసి వున్న శ్రీ కల్యాణ వేంకటేశ్వరస్వామి వారి బ్రహ్మోత్సవాల్లో మూడో రోజైన గురువారం ఉదయం 8 గంటలకు అనంత తేజోమూర్తి అయిన శ్రీనివాసుడు యోగనరసింహుడి అలంకారంలో సింహ వాహనంపై భక్తులకు అభయమిచ్చారు.

- 

ఆంధ్రనాడు, ఫిబ్రవరి 20: చంద్రగిరి మండలంలోని శ్రీనివాసమంగా పురంలో వెలసి వున్న శ్రీ కల్యాణ వేంకటేశ్వరస్వామి వారి బ్రహ్మోత్సవాల్లో మూడో రోజైన గురువారం ఉదయం 8 గంటలకు అనంత తేజోమూర్తి అయిన శ్రీనివాసుడు యోగనరసింహుడి అలంకారంలో సింహ వాహనంపై భక్తులకు అభయమిచ్చారు. వేకువజామున అర్చకులు స్వామివారిని సుప్రభాత సేవతో మేల్కొలిపి కొలువు, పంచాంగ శ్రవణం, తోమాల, సహస్రనామార్చన సేవలు నిర్వహించారు. భక్తులకు దర్శన భాగ్యం కల్పించారు. స్వామివారిని యోగ నరసింహుడిగా అలంకరించి సింహ వాహనంపై ఉంచి తిరు మాడవీధులలో ఊరేగించారు. వాహనం ముందు వృషభాలు, గజరాజులు నడుస్తుండగా, భక్తజన బృందాలు చెక్కభజనలు, కోలాటాలతో స్వామివారిని కీర్తిస్తుండగా, మంగళవాయిద్యాల నడుమ, వేద పండితులు వేదమంత్రాలు పలుకుతుండగా స్వామివారి వాహనసేవ కోలాహలంగా జరిగింది. భక్తులు అడుగడుగునా కర్పూర హారతులు సమర్పించి స్వామివారిని దర్శించుకున్నారు.