క్షత్రియుల పాలిట 'పరశు రాముడు

రామాయణ, మహాభారతాలు రెండింట్లోనూ కనిపించే కొందరు మహాపురుషులు ఉన్నారు. వారిలో పరశురాముడు ఒకరు.

- కె. హేమచందర్ - 9440021108

గత వారం తరువాయి

రామాయణ, మహాభారతాలు రెండింట్లోనూ కనిపించే కొందరు మహాపురుషులు ఉన్నారు. వారిలో పరశురాముడు ఒకరు. పుట్టుక నుంచి శ్రీరాముడికి విష్ణుచాపం సమర్పించడం వరకు ఆ మహనీయుడి పరాక్రమాన్ని చాటే ఘట్టాలెన్నో. శాంతమర్తి అయిన తన తండ్రిని కార్తవీర్యార్జనుడు చంపాడనే కోపంతో, భూమండలం మీద సమస్త రాజవంశీకులను (ఇల, ఇక్ష్వాకు వంశాలు మినహా) హతమార్చాడు. ధర్మం తప్పిన క్షత్రియ వంశాలను నిర్మూలించేందుకు ఆయన ఉపయోగించిన పరశు నేటికీ జార్ఖండ్లో పూజలందుకుంటోంది. మహాభారతంలోని అరణ్యపర్వంలో తృతీయాశ్వాసంలో పరశురాముడి గాథ కనిపిస్తుంది. మాయాజూదంలో రాజ్యాన్ని కోల్పోయిన పాండవులు అడవుల బాట పట్టారు. మునులతో కలసి వారు మహేంద్ర పర్వతాన్ని చూశారు. పరశురాముడిని దర్శించాలని ఉందని, ఆ మహనీయుడి గురించి తెలుసుకోవాలని ఉందని ధర్మరాజు అనగా, పరశు రాముడి శిష్యుడు అకృతవ్రణుడు అనే రుషి ఆ గాథ చెప్పాడు.

కన్యాశుల్కంగా అశ్వాలు

వివాహంలో మహిళలకు స్వేచ్ఛ ఉన్నట్లు పురాణ గాథల్లో స్వయంవరం చెబు తుంది. కన్యాశుల్కం కూడా ఉన్నట్లు కనిపిస్తుంది. కన్యాకుబ్జం అనే రాజ్యాన్ని పాలించే గాధిరాజు కుమార్తె సత్యవతి. ఆమెను తనకు ఇచ్చి వివాహం చేయమని గాధిరాజును భృగు పుత్రుడు రుచీకుడు కోరాడు. ముని కుమారుడికి కుమార్తెను ఇవ్వడం ఇష్టం లేక కన్యాశుల్కం కోరాడు. రాజహంసల్లా తెల్లగా ఉన్న వెయ్యి గుర్రాలు కావాలని, వాటన్నింటికి ఒక చెవి మాత్రమే నల్లగా ఉం డాలని చెప్పాడు. కన్యాశుల్కం ఇస్తే పెళ్లి లేకపోతే లేదని స్పష్టం చేశాడు.