જૂની ચીજોથી નવી સજાવટ કરતાં જાદુઈ ડાબી

પ્રવેશદ્વારથી માંડીને હૉલ, કિચન, ડાઈનિંગ રૂમ, સ્ટોર રૂમ, બેડરૂમ, બગીચો અને પાર્કિંગ એરિયામાં પ્રાચીન રાચરચીલાને મઠારીને, ચુસ્ત-દુરસ્ત કરીને એમણે નવા બંગલાને કળાત્મક ઓપ આપ્યો. સાથે જૂના સમયનો દેગડો, ઘંટી, ગરમ પાણીનો બંબો, પટારો, પ્રાઈમસ, વગેરેને યોગ્ય સ્થાને મૂકીને શોભા વધારી. સમજો કે ઘરનો પ્રત્યેક ખૂણો એમણે દિલથી સજાવ્યો છે. અમદાવાદનાં આ કળાપ્રેમી સન્નારી સાથે ગોઠડી કરવા જેવી છે.

- મહેશ શાહ

‘આપણે નવા ઘરમાં કોઈ જૂની વસ્તુ નથી લઈ જવી. ઈન્ટિરિયર ડિઝાઈનર ઘર સરસ સજાવી આપશે. નવા ઘરમાં તો નવી જ વસ્તુ શોભે...’

શ્રીમતીજીએ જાણે અંતિમ નિર્ણય સંભળાવી દીધો.

‘ઠીક છે, પણ આપણા જૂના કબાટ તો જો કેટલા મજબૂત છે. નવું ફર્નિચર જૂના જેટલું ટકાઉ નહીં હોય.... છતાંય જેવી તારી મરજી.’

આવા સંવાદો દંપતી વચ્ચે સામાન્ય છે. બાપદાદાના સમયનું રાચરચીલું આઉટડેટેડ ગણાય. એનો રંગ ઊડી ગયો હોય. ગમે ત્યારે સડી કે બગડી જાય.

ઊધઈ લાગી હોય, વસ્તુઓ કાટ ખાઈ ગઈ હોય... ખાસ તો નવા ઘરમાં જૂની વસ્તુ સારી ન લાગે, વગેરે.

પાંચેક વર્ષ પહેલાં આવો સંવાદ અમદાવાદનાં એક બંગલામાલિક દંપતી વચ્ચે પણ થયો. જો કે પરિણામ જરા હટકે આવ્યું. એમણે નવા બંગલામાં ઘણેઅંશે પોતાના જૂના બંગલાનું ફર્નિચર અને બીજી સામગ્રી પણ ઉપયોગમાં લીધી. એ સજાવટ કળાત્મક બની.

એ દંપતી એટલે બિંદુ અને ચૈતન્ય શાહ. ચૈતન્યભાઈ વેપારી અને એમનાં પત્ની બિંદુબહેન ફોટોગ્રાફર તથા કળાપ્રેમી. પરિવાર વૈષ્ણવધર્મી. બિંદુ તબીબ પિતા ફૅમિલી ફિઝિશિયન ડૉ. નિરંજન શાહની એકની એક દીકરી. નિરંજનભાઈએ બંગલામાં બગીચો બનાવેલો એટલે દીકરીને બગીચાની સંભાળ શીખવી. બિંદુ સાઈકોલૉજી વિષયમાં એમએ થઈ. ફોટોગ્રાફીનો શોખ જાગ્યો એટલે બગીચામાં આવતાં પંખી, ખિસકોલી, વગેરેના ફોટા પાડે. કોતરણી પણ ગમે.

૧૯૮૧માં ચૈતન્ય શાહ સાથે એનાં લગ્ન થયાં. પછીનાં વર્ષોમાં બન્ને સ્વતંત્ર બંગલામાં રહેવા ગયાં. બાદમાં એક વાઈલ્ડલાઈફ ફોટોગ્રાફરનું માર્ગદર્શન લઈને બિંદુએ વન્યજીવનની તસવીરો લેવા માંડી. દેશ-વિદેશ ફર્યાં.

એ બંગલામાં સવા ત્રણેક દાયકા વિતાવ્યા પછી પાંચેક વર્ષ પહેલાં એમણે વિશાળ જગામાં નવો બંગલો બંધાવ્યો. એ વખતે દરેક ગૃહિણીની જેમ બિંદુને પણ ઘરસજાવટની અદમ્ય ઈચ્છા જાગી.

ઘરસજાવટમાં મધ્યમવર્ગી પરિવારને સીમિત જગા અને નિશ્ચિત રકમની મર્યાદા નડે, પણ બિંદુ શાહને આમાંની એકેય સમસ્યા નડતી નહોતી. આર્થિક સધ્ધરતા પણ હતી અને બંગલાની જગ્યા ખાસ્સી મોટી હતી. જો કે બિંદુબહેનને પોતાના જૂના બંગલા તથા પિતાના બંગલાનો અમુક સામાન ઉપયોગમાં લેવો હતો. ખાસ તો સાગનાં લાકડાંનાં બારી-બારણાં, પલંગ, લોખંડના કબાટ ઉપરાંત અમુક ઘરવખરી. વળી, એને નવા બંગલામાં સીધી ગોઠવી દેવી નહોતી, બલકે નવા રૂપ-રંગમાં મૂકવી હતી.