ઑપરેશન સિંદૂર આ છે સફળતાના સૂત્રધાર

પાકિસ્તાનમાં સક્રિય એવા આતંકવાદના અનેક અડ્ડા, એનાં ડઝન જેટલાં વિમાનમથક તથા રડાર સ્થાનકોનો કચ્ચરઘાણ કરી નાખવા અને સાથોસાથ ભારત તરફ આવતાં સેંકડો ડ્રોન કે મિસાઈલ્સના હુમલા ખાળવા ભારતે કયાં અસ્ત્રો-શસ્ત્રોનો ઉપયોગ કર્યો?

- હીરેન મહેતા (મુંબઈ)

રવિવાર, ૧૧ મેની સવારે ઉત્તર પ્રદેશના પાટનગર લખનઉમાં એક આ ફૅક્ટરીનું ઉદ્ઘાટન થયું. આ ફૅક્ટરી બ્રહ્મોસ એરોસ્પેર ની છે, જ્યાં પ્રતિ વર્ષ ૧૦૦ બ્રહ્મોસ મિસાઈલ બનવાની છે. ભારત અને રશિયાએ સાથે મળીને વિકસાવેલી આ મિસાઈલ છે. ટૂંકા અને મધ્યમ અંતરની મિસાઈલની શ્રેણીમાં બ્રહ્મોસ અત્યારે સૌથી વેગીલી અને સૌથી વેધક મિસાઈલ ગણાય છે. કલાકના ૩૦૦૦ કિલોમીટર કરતાંય વધુ ઝડપે ધસી જતી આવી તેજ મિસાઈલ અત્યારે તો અમેરિકા કે ચીન પાસે સુદ્ધાં નથી!

ભારતીય સંરક્ષણદળોના ભાથામાં આ મિસાઈલ ૨૦૦૬-૦૭થી છે અને આ વર્ષોમાં આપણી ત્રણેય સેનાએ એનાં ૧૧૦ જેટલાં પરીક્ષણ પણ કર્યાં છે. આ મિસાઈલની ખાસિયત એ છે કે એ જમીન પરથી છોડી શકાય છે, આપણા નૌકાદળનાં કેટલાંક જહાજોમાં પણ એ ગોઠવવામાં આવી છે તો હવાઈ દળનાં ઘણાં પ્લેન સુદ્ધાં એનાથી સજ્જ છે. જો કે એનો પહેલવહેલો ઉપયોગ હમણાં જ થયો. એ પણ ઉત્તર પ્રદેશના નવા પ્લાન્ટના ઉદ્દઘાટનના બે-પાંચ દિવસ અગાઉ! હા, સાતથી નવ મેની વચ્ચેના ગાળામાં. જમ્મુ-કશ્મીરના પહલગામમાં થયેલા હિચકારા આતંકી હુમલા સામે આદરેલા ઑપરેશન સિંદૂરના ભાગ રૂપે ભારતે અલગ અલગ ટાર્ગેટને વીંધવા જે જુદી જુદી મિસાઈલ સિસ્ટમ અજમાવી એમાં આ બ્રહ્મોસ પણ હતી.

ઑપરેશન સિંદૂર પાર પડ્યા પછી સોમવાર, ૧૨ મેની રાત્રે પોતાના રાષ્ટ્રજોગ પ્રવચનમાં વડા પ્રધાન નરેન્દ્ર મોદીએ જેને વૈશ્વિક આતંકવાદનો અડ્ડો ગણાવ્યો એ જૈશ-એ-મોહમ્મદના બહાવલપુર કેન્દ્રનો સફાયો કરવા ભારતે ફ્રેન્ચ-બ્રિટિશ બનાવટની સ્કેલ્પ મિસાઈલની જેમ બ્રહ્મોસનો પણ ઉપયોગ કર્યો. સ્કેલ્પ મિસાઈલ આપણી પાસેનાં ફ્રેન્ચ રફાલ વિમાનનાં શસ્ત્રોના ભાથામાં છે, તો બ્રહ્મોસ છે રશિયન સુખોઈ-૩૦ પ્લેનના ફાયર પાવરનો ભાગ.