સમાજની સાચી સેવા તો સહકારથી જ શક્ય બને

સામાન્ય જીવનને અસામાન્ય બનાવવા માટેની ઝંખનાએ આ મહિલાને નવી દિશા આપી. પરિવાર પ્રત્યે જવાબદારી પૂર્ણ કરી. જ્યારે પોતાના માટે સમય મળ્યો ત્યારે એણે સમાજસેવામાં કંઈક વિશેષ કરવાનું નક્કી કર્યું. આજે એની શરૂ કરેલી યાત્રા અનેક લોકો માટે પ્રેરણા બની સમાજમાં હકારાત્મક ફેરફાર લાવી રહી છે.

- હેતલ રાવ

એમનું મૂળ નામ વંદના સુરાણી, જન્મ અને અભ્યાસ રાજકોટમાં. લગ્ન પછી અમદાવાદમાં પતિ અને પરિવાર સાથે સ્થાયી થયાં. લગ્ન પછી એમનું નામ થયું વર્ષો મજેઠિયા. આજે આ જ નામ એમની ઓળખ બની રહી છે. સંસ્કારમય અને સુખી-સંપન્ન પરિવારની વર્ષાના પિતા રમેશભાઈનું ટેલરિંગ ક્ષેત્રે આગવું સ્થાન, અનેક દુકાનો એમની ઓળખનું પ્રતિબિંબ હતી. સાથે કન્સ્ટ્રક્શનનું કામ પણ કરતા. માતા મીનાબહેન પ્રેમાળ ગૃહિણી. ચાર ભાઈ-બહેનમાં વંદના ઉર્ફે વર્ષા ત્રીજા નંબરે. બા, દાદા, કાકા, કાકી સાથે મળીને ૨૧ વ્યક્તિના સંયુક્ત પરિવારમાં ઉછેર. બાળપણથી જ વડીલોનો સેવાભાવ જોઈને વિચારતી કે હું મોટી થઈને સમાજસેવાનાં કાર્ય કરીશ... પરંતુ ગ્રેજ્યુએશનની સાથોસાથ ૨૦ વર્ષની ઉંમેરે એનાં લગ્ન અમદાવાદમાં રહેતા એન્જિનિયર હિતેશભાઈ મજેઠિયા સાથે થયાં. ત્યાથી શરૂ થયું એનું નવું જીવન.

પરિવારની જવાબદારી, જીવનની ઊથલપાથલ

અને સંઘર્ષ વચ્ચે વર્ષા મજેઠિયાએ અસાધારણ ધીરજ અને મક્કમતા દાખવી. લગ્નનાં ૨૦ વર્ષ સુધી પરિવાર અને બાળકોની સંભાળમાં સમય વિતાવ્યો, પણ જ્યારે થોડો અવકાશ મળ્યો ત્યારે સમાજસેવામાં પોતાની આગવી ઓળખ બનાવી.

મહિલાઓ અને બાળકો માટે કંઈક કરવાનું સપનું સાકાર કરવા બીઈંગ વુમન ચૅરિટેબલ ટ્રસ્ટની સ્થાપના કરી. સામાજિક, આરોગ્ય, મહિલા અને બાળકલ્યાણ માટે કાર્ય શરૂ કર્યું. એકલા હાથે નહીં, સાથે મળી એક નવું સ્વપ્ન સાકાર કરીએ એ વિઝન સાથે એમણે ૨૫૦થી વધુ મહિલા સ્વયંસેવકો અને ૧૦૦૦થી વધુ વિદ્યાર્થીઓને સમાજસેવામાં જોડ્યાં.

ગુજરાતી મહિલાઓનાં પ્રભાવશાળી કાર્યને માન્યતા આપવા ગાથા ગૌરવવંતી ગુજરાતની સંસ્થા શરૂ કરી. વર્ષાબહેન સામાજિક કાર્યકરની સાથે લાયન્સ ક્લબ ઑફ સિદ્ધિવિનાયક (Lions Club of Siddhivinayak)નાં પ્રેસિડન્ટ, એકશા બિઝનેસ વર્કિંગ ગ્રુપ (Eksha Business Working Group)નાં સ્થાપક અને લિનન ચિક ગાર્મેન્ટ બ્રાન્ડ (Linen Chic Garment Brand)નાં ડિરેક્ટર પણ છે. સંઘર્ષનું સરનામું અને અનોખી સફર જેવાં પુસ્તકનાં સંપાદક દ્વારા આજે એ અનેક મહિલાઓને જીવનમાં જીતવાની પ્રેરણા આપી રહ્યાં છે.