કૉલર આઈ-ડી ઍપનો લાભ લેવાનું ચૂકી તો નથી ગયા ને?

નાગરિકોને સ્પામ કૉલ મારફતે હેરાન કરવામાં આપણા દેશનો નંબર દુનિયામાં ચોથો છે. ૬૪ ટકા દેશવાસીઓને દિવસમાં સરેરાશ ત્રણથી પણ વધુ સ્પામ કૉલ આવે છે... આ ત્રાસથી કેમ બચવું?

- પુનીત આચાર્ય સોમપુરા

ઈઝરાયલમાં એક પ્રખ્યાત કૅન્સર હૉસ્પિટલ છે. નામઃ શેબા મેડિકલ સેન્ટર. ડૉ. તલ સપીરા એ હૉસ્પિટલમાં કિમોથેરાપી નિષ્ણાત છે. આખા દિવસ દરમિયાન એમને દરદી ઉપરાંત બીજા ત્રીસેક ફોન આવતા હશે. આ ડૉક્ટર ઉપયોગ કરે છે CallApp મોબાઈલ ઍપ્લિકેશનનો. જેટલી વાર રિંગ વાગે એટલી વાર ફોનની સ્ક્રીન જોઈને એમને આઈડિયા આવી જાય છે કે ફોન સ્પામ કૉલ છે કે ઉપાડવાલાયક.

આપણા એક ગુજરાતી બંધુ હર્ષરાજ શાહ અમેરિકાના ન્યુ જર્સીમાં રહે છે. એમના પર ઈન્ડિયાથી ફોન ગયો કે તમારા ડૅડીએ અમારી મારફતે ખરીદેલા શૅર હવે કરોડોના થઈ ગયા છે. તમારા નામે ટ્રાન્સફર કરાવવાના બાકી છે. જો કરવા હોય તો તમારાં બધાં ડોક્યુમેન્ટ WhatsApp દ્વારા મોકલી આપો. જો કે ટ્રુકૉલર જેવી જ Hiya ઍપે સાઈબર ફ્રૉડની બાજી અહીં ઊંધી વાળી દીધી.

અમદાવાદસ્થિત પ્રખ્યાત એક્યુપ્રેશર નિષ્ણાત વિજય પરસાણા TrueCaller કૉલર આઈડી ઍપના ચાહક છે વિજયભાઈને એક દિવસ અજાણ્યા નંબર પરથી ફોન આવ્યો. TrueCaller ઍપમાં નામ દેખાયું, વિક્રમ સોલંકી. પરસાણાજી ફ્લેશ-બેંકમાં સરી પડ્યાઃ આ તો મારી સાથે જેસર ગામે સ્કૂલમાં ભણતો હતો. એનો જ ફોન આવ્યો કે શું? ફોન ઉપાડ્યો. અને અહો આશ્ચર્યમ... સામે એ જ વિક્રમ સોલંકી નામનો મિત્ર હતો!