ગિફ્ટમાં શરાબની નવી છૂટ નવા પ્રશ્નો સર્જશે?

આ એક અપવાદ છે કે ગુજરાતમાં દારૂબંધી હળવી કરવાની દિશામાં પહેલું પગલું? રાજ્યના બીજા વિસ્તારોમાં પણ આવી માગણી ઊઠી તો સરકાર શું કરશે? આવા અનેક સવાલના કનકવા ચગવા લાગ્યા છે, પણ એક વાત નક્કી છે કે દારૂબંધી કોઈ રીતે ગુજરાતના વિકાસમાં અવરોધ બની નથી.

- કેતન ત્રિવેદી

ગુજરાતમાં દારૂબંધી હોવી જોઈએ કે નહીં? ગુજરાતની સ્થાપનાથી લઈને આજ સુધી આ સવાલ રાજ્યમાં કાયમ એક મધપૂડાની માફક ઝળૂબતો રહ્યો છે. કોઈ પણ સરકાર કે કોઈ પણ રાજકીય પક્ષે આજ સુધી આ મધપૂડાને છંછેડવાની હિંમત કરી નહોતી, પણ છેવટે મુખ્ય મંત્રી ભૂપેન્દ્ર પટેલની સરકારે પૂર્ણતઃ નહીં તો આંશિક રીતે આ મધપૂડા પર કાંકરી ફેંકીને એને છંછેડવાની હિંમત કરી છે.

જ્યારથી રાજ્ય સરકારે ગાંધીનગરસ્થિત ગિફ્ટ સિટીમાં શરાબનાં વેચાણ-સેવનની છૂટ આપવાની જાહેરાત કરી છે ત્યારથી મધમાખી ગણગણે એમ ગુજરાતમાં ગણગણાટ શરૂ થઈ ચૂક્યો છે. ગિફ્ટ સિટીમાં કામ કરનારાઓને કે મુલાકાતીઓને કઈ શરતોને આધીન, કઈ મર્યાદામાં આ છૂટ અપાશે એની પૂરેપૂરી વિગત હજુ આવવાની બાકી છે, પણ દારૂબંધીના મુદ્દે ગુજરાત અત્યારથી જ બે ભાગમાં વહેંચાઈ ચૂક્યું છે. યાદ રહે, દારૂબંધી હટાવવાના મુદ્દે ગુજરાતમાં બે અંતિમ મત પ્રવર્તે છેઃ કાં તો હટાવી દો, કાં તો રાખો. ત્રીજા કે મધ્યમ મતનું અહીં વજૂદ જ નથી.