રશિયાના નામે રાજનીતિની રમતમાં જીત્યું છે ભારત

બાર ભાયા ને તેર ચોકા જેવી વૈશ્વિક રાજકારણની સ્થિતિમાં G20 સમૂહના રાષ્ટ્રનેતાઓની પરિષદ વિના વિઘ્ન પાર પાડી વડા પ્રધાન નરેન્દ્ર મોદીએ ઉત્કૃષ્ટ નેતાગીરી દાખવી છે અને કેટલાક પેચીદા પ્રશ્ન ઉકેલવાની દિશામાં પહેલ પણ કરી છે. સવાલ બસ, યોગ્ય રીતે આગળ વધવાનો છે.

- હીરેન મહેતા

G20 શિખર પરિષદ નિમિત્તે દિલ્હી આવેલા જો બાઈડન સહિતના આગેવાનો સાથે નરેન્દ્ર મોદી: 'ગ્લોબલ બાયો-ફ્યુઅલ્સ એલાયન્સ’ રૂપી પહેલ.

આંતરરાષ્ટ્રીય સ્તરની પરિષદમાં ભાગ્યે જ જોવા મળે એવી તમામ ઉપસ્થિત આગેવાનોની સહમતી મેળવવાની સાથે વડા પ્રધાન નરેન્દ્ર મોદીએ G20 સમૂહના રાષ્ટ્રનેતાઓની બેઠકનું સંચાલન સફળતાપૂર્વક પાર પાડ્યું. મોદીના વિરોધીઓ આ શિખર પરિષદના આયોજનમાં પોરા કાઢવા ધારે તોય એમને ઝાઝું કંઈ મળવાનું નથી.

આવા મોટા સ્તરની બેઠકોમાં મૂળ તો મોટા આગેવાનોના અહં સૌથી વધુ સાચવવાના હોય છે. એમાંય આપણા માટે સૌથી મોટી મુશ્કેલી એ હતી કે રાજનીતિને લગતા ઠરાવમાં આપણું નિકટનું સાથીદાર રશિયા અપરાધીના પાંજરામાં હતું. યુક્રેન પરના આક્રમણના મામલે અમેરિકા ઉપરાંત પશ્ચિમ યુરોપના દેશો દિલ્હીની શિખર પરિષદમાં રશિયાની ઝાટકણી કાઢતો ઠરાવ પસાર કરાવવા ઈચ્છતા હતા. રશિયાની કડક ટીકા કરતો પ્રસ્તાવ રજૂ પણ થાય તો યજમાન અને એથીય વિશેષ રશિયાના મિત્ર તરીકે આપણે શરમમાં મુકાવું પડે એવી નોબત આવી શકે. આ સ્થિતિમાં પડદા પાછળ દિવસો સુધી મોદી અને એમના અધિકારીઓએ મુત્સદ્દીગીરીની રમત રમી છેવટે સાપ પણ મરે નહીં ને લાઠી પણ તૂટે નહીં એવો મુસદ્દો પ્રસ્તુત કર્યો. રશિયાનું નામ લીધા વગર યુક્રેનમાં ચાલી રહેલા યુદ્ધનો ઉલ્લેખ કરવામાં આવ્યો અને કોઈ દેશે બીજા રાષ્ટ્રની જમીન પર બળજબરીથી કબજો જમાવવો નહીં એવી ચેતવણી આપવામાં આવી, એ પણ રશિયાના નામોલ્લેખ વિના! મભમ જેને જે સમજવું હોય એ ભલે સમજે.