નાણાં મંત્રાલય અને સેબીનું લક્ષ્ય ગ્લોબલ બની રહ્યું છે ભારતીય કૅપિટલ માર્કેટ

મૂડીબજારમાં નવા સુધારા સાથે વિકાસની દિશામાં આગળ વધવા નાણાં મંત્રાલય અને નિયમનતંત્ર ‘સેબી’ વધુ સક્રિય થયાં છે. કૅપિટલ માર્કેટને ધીમે ધીમે ગ્લોબલ સ્વરૂપ આપવા ઉપરાંત ભારતીય કંપનીઓને મૂડી ઊભી કરવાની વધુ તક આપવા ચોક્કસ નિર્ણય લેવાયા છે અને ચોક્કસ પગલાંના અમલની તૈયારી થઈ રહી છે.

- જયેશ ચિતલિયા

નાણાપ્રધાન નિર્મલા સીતારમણ: દુનિયાની બજારો તરફ પણ નજર દોડાવો.

શૅરબજારમાં પ્રવાહિતા વધે, પારદર્શકતા વધે, વ્યવહારોની ઝડપ વધે અને આ સાથે રોકાણકારોની રક્ષા પણ વધે તેમ જ માર્કેટ વધુ કાર્યક્ષમ બને એવા વિવિધ ઉદ્દેશ સાથે નિયમન સંસ્થા સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)એ તાજેતરમાં ચોક્કસ પગલાં બાબતે વિચારણા હાથ ધરી છે.

સેબીનાં પગલાં વિશે વાત કરતાં પહેલાં નાણાખાતાના ગ્લોબલ લક્ષ્યને સમજીએ. ગયા સપ્તાહમાં નાણાપ્રધાન નિર્મલા સીતારમણે ભારતની ગ્રોથ સ્ટોરીની વાત વિશ્વ સમક્ષ મૂકીને બે મોટી જાહેરાત કરી. એક, સ્થાનિક કંપનીઓ ચોક્કસ ઓવરસીઝ એક્સચેન્જ પર સીધું લિસ્ટિંગ કરાવી શકશે, આને પરિણામે ભારતીય કંપનીઓને વિવિધ વિદેશી બજારોમાંથી ફંડ ઊભું કરવાની તક મળશે. જો કે એ પહેલાં સ્થાનિક લિસ્ટેડ કે અનલિસ્ટેડ કંપનીઓએ ગાંધીનગરસ્થિત ગિફ્ટ સિટીમાં આવેલા આઈએફએસસી (ઈન્ટરનૅશનલ ફાઈનાન્સિયલ સર્વિસીસ સેન્ટર) પર લિસ્ટિંગ કરાવવાનું રહેશે.