રાજકાજ

ટ્રમ્પના તઘલખી નિર્ણયથી અમેરિકાને જ નુકસાન

- ચાણક્ય

અમેરિકાના પ્રમુખ ડોનાલ્ડ ટ્રમ્પના અવિચારી નિર્ણયો અમેરિકાને જ ભારે પડી રહ્યા છે. એચ-૧ બી વિઝા અંગે ગત સપ્તાહે ફી વધારાના એકાએક જાહેર કરેલા નિર્ણયના વિપરીત પ્રત્યાઘાતો પડી રહ્યા છે. ટ્રમ્પના વહીવટી તંત્રએ એચ-૧ બી વિઝાની ફી વધારીને એક લાખ ડૉલર કરી નાખી છે. તેનાથી નોકરી અથવા અન્ય સ્કિલ્ડ જોબ માટે અમેરિકા જતાં લોકોને ભારે આંચકો લાગ્યો છે. આ નિર્ણયની અસર વધતે ઓછે અંશે વિશ્વના અસંખ્ય દેશોને થઈ છે. તેમાં સૌથી વધુ સંખ્યા ભારતીયોની છે. જે લોકો અત્યાર સુધી છથી સાત લાખ રૂપિયા સુધીની ફી ચૂકવતા હતા તેમને હવે દસ ગણા વધારે રૂપિયા ચૂકવવાના થયા છે. હવે આ ફી વધીને એંસી લાખથી વધુ રૂપિયાની થઈ ગઈ છે. આ સંજોગોમાં મોટા ભાગના લોકો માટે અમેરિકામાં કામ કરવાનું મુશ્કેલ બનશે.