ജിഎസ്ടി കുറയ്ക്കൽ; 10 വർഷംകൊണ്ട് ഏതൊക്കെ മേഖലകൾ മികച്ച പ്രകടനം കാഴ്ചവയ്ക്കും?

ചരക്കുസേവന നികുതി (ജിഎസ്ടി) നിരക്കുകളിലുണ്ടായ കുറവും പരിഷ്കാരങ്ങളും ഇന്ത്യയുടെ സമ്പദ്വ്യവസ്ഥയിലുടനീളം ഘടനാപരമായ മാറ്റങ്ങൾക്കു കാരണമാകും

- CA സജീഷ് കൃഷ്ണൻ കെ. മാനേജിങ് ഡയറക്ടർ AAA Profit Analytics (P) Ltd SEBI Registration Number: INH200009193

ചരക്കുസേവന നികുതി (ജിഎസ്ടി) നിരക്കുകളിലുണ്ടായ കുറവും പരിഷ്കാരങ്ങളും ഇന്ത്യ യുടെ സമ്പദ്വ്യവസ്ഥയിലുടനീളം ഘടനാപരമായ മാറ്റങ്ങൾക്കു കാരണമാകും. ഒട്ടേറേ മേഖലകളിൽ ഉപഭോഗവും ലാഭക്ഷമതയും വർധിപ്പിക്കും. കൂടുതൽ മേഖലകളെ സംഘടിത സ്വഭാവത്തിലേക്കു കൊണ്ടു വരും. എഫ്എംസിജി, കൺസ്യൂമർ ഡ്യൂറബിൾസ്, ഓട്ടോ, കെമിക്കൽസ്, സിമന്റ്, റിയൽ എസ്റ്റേറ്റ്, ടെക്സ്റ്റൈൽസ്, തിരഞ്ഞെടുത്ത സേവനങ്ങൾ എന്നിവ മികച്ച പ്രകടനം കാഴ്ചവയ്ക്കാൻ സാധ്യതയുണ്ട്. ഈ വിഭാഗങ്ങളിലെ ഓഹരികൾ സുസ്ഥിര വളർച്ച നേടിയേക്കും.

എന്തൊക്കെ പ്രതീക്ഷിക്കാം?

1 ഡിമാൻഡ് ഉയരും: ജിഎസ്ടി കുറഞ്ഞതോടെ പല സാധനങ്ങളുടെയും വില കുറയും. ഇത് ജനങ്ങളുടെ വാങ്ങൽ ശേഷി വർധിപ്പിക്കും. അടുത്ത ഒരു ദശകത്തിലുടനീളം സ്ഥിരമായ ഡിമാൻഡ് നിലനിർത്തുകയും ചെയ്യും.

മൾട്ടിപ്ലയർ ഇഫക്ട്: റിപ്പോനിരക്ക്, സിആർആർ, ആദായനികുതി മാറ്റങ്ങൾ എന്നീ നയപരിഷ്കാരങ്ങളും ജനങ്ങളുടെ പക്കലെ പണലഭ്യത വർധിപ്പിക്കുന്നതാണ്. ഈ സാഹചര്യം കോർപറേറ്റുകൾ ക്കും എംഎസ്എംഇകൾക്കും ബിസിനസ് വിപുലീകരണത്തിനുള്ള മികച്ച അവസരം കൂടിയാണ്.

കാര്യങ്ങൾ ലളിതമാകും. ജിഎസ്ടി 5%, 18% എന്നിങ്ങനെ രണ്ടു പ്രധാന സ്ലാബുകളിലേക്കെത്തിയതും വേഗത്തിലുള്ള റീഫണ്ടുകളും ചെലവും സമയവും കുറയ്ക്കാൻ സഹായിക്കും. പ്രധാനമായും എംഎസ്എംഇകൾക്കും സ്റ്റാർട്ടപ്പുകൾക്കും ഇതിന്റെ നേട്ടം ലഭിക്കും. സംഘടിത മേഖലയിലേക്കു കൂടുതൽ ആളുകൾ എത്താനും നികുതിവരുമാനം ഉയരാനും ഇതു സഹായിക്കുകയും ചെയ്യും. സാമ്പത്തിക വളർച്ചയാണ് ഇതിന്റെയെല്ലാം ഫലം.

ഈ മേഖലകൾ നേട്ടമുണ്ടാക്കും

അവശ്യ വസ്തുക്കൾ, എഫ്എംസിജി: അവശ്യ വസ്തുക്കൾക്ക് ഇപ്പോൾ 5% ജിഎസ്ടി ആയതിനാൽ ബ്രിട്ടാനിയ, ഹിന്ദുസ്ഥാൻ യൂണിലിവർ, നെ, കോൾഗേറ്റ്, ഡാബർ, ഗോദ്റെജ്, ഐടിസി തുടങ്ങിയ മുൻനിര കമ്പനികൾക്ക് ഉയർന്ന അളവിൽ വിൽപന നേടാനാകും. മെച്ചപ്പെട്ട മാർജിൻ നേടാനും സാധിക്കും.