ധാരാളം പണം ഇല്ലാതെയും സമ്പന്നനാകാം

പലപ്പോഴും ഇടത്തരക്കാർ വരവിനപ്പുറം പണം ചെലവഴിക്കുകയാണ്. ഇതിന്റെ കാരണം കുടുംബത്തിൽ നിന്നും സുഹൃത്തുക്കളിൽ നിന്നും സഹപ്രവർത്തകരിൽനിന്നുമുള്ള സമ്മർദമാവാം

- ജോജി കല്ലറയ്ക്കൽ

"ബാങ്കിന്റെ ചീഫ് മാനേജരായ ശേഷമാണ് ഞാൻ കാർ വാങ്ങുന്നത്. അതും ഒരു സെക്കൻഡ് ഹാൻഡ് കാർ,' പറയുന്നത് സൗത്ത് ഇന്ത്യൻ ബാങ്കിന്റെ മുൻ ചെയർമാനും പ്രശസ്ത എഴുത്തുകാരനുമായ സേതു.

"കുറഞ്ഞ ചെലവിലുള്ള വീടാണ് ഞാൻ വച്ചത്. 1990ൽ ആ വീടിന് 3.5 ലക്ഷം രൂപമാത്രമേ ചെലവായുള്ളൂ. ബാങ്കിൽ നിന്നും കുറഞ്ഞ പലിശയ്ക്കു വായ്പ കിട്ടുമായിരുന്നിട്ടും വരുമാനത്തിനനുസരിച്ചുള്ള തുക മാത്രമേ ഞാൻ എടുത്തിട്ടുള്ളൂ.' താങ്ങാവുന്നതിൽ അധികം ലോൺ ആത്മഹത്യയിലാകും കൊണ്ടെത്തിക്കുന്നതെന്നും അദ്ദേഹം പറയുന്നു. കിട്ടുന്ന വരുമാനത്തിൽ സന്തോഷമായി ജീവിക്കാനുള്ള രീതികളെക്കുറിച്ച് അദ്ദേഹം വിശദീകരിക്കുന്നു.