ജാഗ്രത, പെൻഷൻകാരെ നോട്ടമിട്ട് തട്ടിപ്പുസംഘം

പെൻഷൻകാരുടെ വിവരങ്ങൾ പൂർണരൂപത്തിൽ തട്ടിപ്പുകാർക്ക് എങ്ങനെ ലഭിച്ചു എന്നതാണ് ചോദ്യം. സർക്കാർ സംവിധാനത്തിൽനിന്നുണ്ടായ വിവരച്ചോർച്ച മൂലം ദുരിതം അനുഭവിക്കുന്നതു നിസ്സഹായരായ പെൻഷൻകാരാണ്.

- 

സർവീസ് പെൻഷൻകാരുടെ വിവരശേഖരണ നടപടികൾ ആരംഭിച്ചതോടെ പെൻഷൻകാരെ ലക്ഷ്യമിട്ടുള്ള സൈബർ തട്ടിപ്പും വ്യാപകമാകുന്നു. പെൻഷൻകാരെ ഫോണിൽ വിളിച്ച് പെൻഷൻ വിവരങ്ങൾ പറഞ്ഞുകേൾപ്പിച്ച് ഒടിപി ചോർത്തിയാണ് പുതിയ തട്ടിപ്പ്. വിവരശേഖരണത്തിന്റെ ഭാഗമായി ട്രഷറിയിൽ നിന്നാണെന്നു തെറ്റിദ്ധരിച്ച് ഒടിപി നൽകിയ പലരും തട്ടിപ്പുകാരുടെ വലയിൽ കുടുങ്ങിയിട്ടുണ്ട്. കേന്ദ്ര-സംസ്ഥാന പെൻഷൻകാരെ ലക്ഷ്യമിട്ടാണ് സൈബർ തട്ടിപ്പുകാർ വലവിരിക്കുന്നത്.

ജീവൻ പ്രമാൺ പത്രയുടെ പേരിൽ

ട്രഷറി ഡയറക്ടറേറ്റിൽ നിന്നാണെന്ന വ്യാജേന യാണ് ഫോൺ വിളിയെത്തുന്നത്. നിയമനത്തീയതി, വിരമിക്കൽ തീയതി, പെൻഷൻ പേയ്മെന്റ് ഓർഡർ നമ്പർ, ആധാർ നമ്പർ, സ്ഥിരം മേൽവിലാസം, ഇമെയിൽ ഐഡി, വിരമിക്കുമ്പോൾ ലഭിച്ച തുക, മാസ പെൻഷൻ, നോമിനി തുടങ്ങിയ വിവരങ്ങളെല്ലാം അവർ പറയും. ജീവൻ പ്രമാൺ പുതുക്കുന്നതിനായി ലഭ്യമായ വിവരങ്ങൾ സ്ഥിരീകരിക്കണം എന്നും അതിനായി ഫോണിൽ വരുന്ന ഒടിപി പറഞ്ഞുകൊടു ക്കണം എന്നും ആവശ്യപ്പെടും. പറയുന്ന വിവരങ്ങളെല്ലാം ശരിയായതിനാൽ സംശയം കൂടാതെ ഒടിപി പറഞ്ഞുകൊടുക്കുകയും ചെയ്യും. അതോടെ പെൻഷൻകാരുടെ ബാങ്ക് അക്കൗണ്ടിന്റെ നിയന്ത്രണം ലഭി ക്കുന്ന തട്ടിപ്പുകാർ തുക മുഴുവൻ പിൻവലിക്കുകയും ചെയ്യും.

പെൻഷൻ മസ്റ്ററിങ് നിർബന്ധം

കേന്ദ്ര പെൻഷൻകാർക്കാണ് ജീവൻ പ്രമാൺ പ്രത ആവശ്യം. പെൻഷൻകാരൻ ജീവിച്ചിരിക്കുന്നു എന്ന് ഉറപ്പുവരുത്താനായി ഓരോ വർഷവും ഡിജിറ്റൽ ലൈഫ് സർട്ടിഫിക്കറ്റ് സമർപ്പിക്കണം. അതിനു ജീവൻ പ്രമാൺ ആവശ്യമാണ്. എന്നാൽ ജീവൻ പ്രമാൺ പത്ര പുതുക്കാനായി ഫോണിലോ ഓൺലൈനായോ ബന്ധപ്പെടില്ല എന്ന് അധികൃതർ വ്യക്തമാക്കുന്നു. തട്ടിപ്പിൽ കുടുങ്ങരുതെന്ന മുന്നറിയിപ്പും അവർ നൽകുന്നുണ്ട്.