സമ്പത്ത് സൃഷ്ടിക്കാൻ മികച്ചത്; ടോപ് അപ് എസ്ഐപി

15 വർഷത്തേക്കാണെങ്കിൽ ഫ്ലക്സിക്യാപ് ആകാം. 7 വർഷമാണെങ്കിൽ ലാർജ് ക്യാപ് ആകും മികച്ചത്.

- അജിത് മേനോൻ, പിജിഐഎം മ്യൂച്വൽ ഫണ്ട്, സിഇഒ

മ്യൂച്വൽ ഫണ്ടിലെ സൂപ്പർ ഹീറോ എസ് ഐപി അല്ല ടോപ്-അപ് എസ്ഐപിയാണ്. സമ്പത്തു സൃഷ്ടിക്കുന്നതിൽ അതിന്റെ പവർ മറ്റൊന്നിനുമില്ല. പറയുന്നത് പ്രമുഖ മ്യൂച്വൽ ഫണ്ട് കമ്പനിയായ പിജിഐഎമ്മിന്റെ സിഇഒ അജിത് മേനോൻ. മ്യൂച്വൽ ഫണ്ട് നിക്ഷേപർക്ക് ഒട്ടേറെ മികച്ച മാർഗനിർദേശങ്ങൾ നൽകുന്ന അദ്ദേഹത്തി ന്റെ അഭിമുഖം വായിക്കാം.

ടോപ് അപ് എസ്ഐപി എന്ന സൂപ്പർ ഹീറോ

മ്യൂച്വൽ ഫണ്ടിലെ സൂപ്പർ ഹീറോ ടോപ് അപ് എസ്ഐപി ആണെന്നു ഞാൻ പറയും. ടോപ് അപ് എസ്ഐപിയിൽ നിങ്ങൾക്ക് ഓരോ വർഷവും നിശ്ചിത ശതമാനം വീതം നിക്ഷേപ തുക വർധിപ്പിക്കാം. അതായത് 5,000 രൂപവച്ചു തുടങ്ങിയാൽ രണ്ടാം വർഷം അത് 5,500 രൂപയാക്കുക. അടുത്ത വർഷം 6,050 രൂപയായി ഉയർത്തണം. അങ്ങനെ വർഷംതോറും നിക്ഷേപത്തുക ഉയരും. അതിന്റെ പവർ സൂപ്പറാണ്.

20 വർഷ കാലാവധിയിൽ നിങ്ങൾ തുടക്കത്തിൽ 20,000 രൂപ എസ്ഐപി ചേർന്നു എന്നിരിക്കട്ടെ. എന്നാൽ അതിലും കൂടുതൽ നേട്ടം 10,000 രൂപവച്ച് ടോപ് അപ് എസ്ഐപി ചേർന്നയാൾക്കു കിട്ടും. കാരണം തുടങ്ങിയാൽ 13-14 വർഷമാകുമ്പോഴേക്കു നിക്ഷേപത്തുക 25,000-26,000 രൂപയാകും.

പോക്കറ്റിനു താങ്ങാവുന്ന തുകയ്ക്കു തുടങ്ങിയാൽ മതി. അച്ചടക്കത്തോടെ കൃത്യമായി നിക്ഷേപിക്കണം. വരുമാനം കൂടുന്നതനുസരിച്ചു നിക്ഷേപവും ഓട്ടമാറ്റിക്കായി വർധിക്കും. അതും നിങ്ങൾ പോലും അറിയാതെ. അതുകൊണ്ടാണ് സമ്പത്തു സൃഷ്ടിക്കലിലെ സൂപ്പർ ഹീറോ ടോപ് അപ് എസ്ഐപി ആണെന്നു പറയുന്നത്.

എസ്ഐപി എത്ര നാളേക്കു വേണം?

എസ്ഐപി ഏറ്റവും കുറഞ്ഞത് 7 വർഷത്തക്കെങ്കിലും വേണം. ആദ്യ 5 വർഷംവരെ വലിയ നേട്ടമൊന്നും കാണിച്ചു എന്നുവരില്ല. പക്ഷേ, ആറാമത്തെ അല്ലെങ്കിൽ ഏഴാമത്തെ വർഷം കാര്യമായ നേട്ടം ലഭിക്കും.

ഓരോ ലക്ഷ്യത്തിനും ഓരോ എസ്ഐപി ചേരുകയാണു നല്ലത്. റിട്ടയർമെന്റ്, വീട്, കുട്ടികളുടെ പഠനം.തുടങ്ങി ഓരോ ലക്ഷ്യങ്ങൾക്കുമായി വ്യത്യസ്ത എസ്ഐപി തുടങ്ങുക. ഒറ്റ എസ്ഐപി ആണെങ്കിൽ ഇടയ്ക്ക് അത്യാവശ്യത്തിനു പിൻവലിക്കേണ്ടി വന്നാൽ പിന്നെ ലക്ഷ്യങ്ങൾ ഫലം കാണാതെ പോകും.

അനുയോജ്യമായ ഫണ്ട് തിരഞ്ഞെടുക്കാം

1. കാലയളവ് പ്രധാനം

ആദ്യം തീരുമാനിക്കേണ്ടത് ഇപ്പോൾ നടത്തുന്ന നിക്ഷേപം എത്ര കാലം തുടരും എന്നതാണ്. 5മുതൽ 7വർഷംവരെയുണ്ടെങ്കിൽ റിസ്ക് കുറയും.