യാത്രകൾ സുഗമമാക്കാൻ ഇൻഷുറൻസ് അനിവാര്യം

ഏതാവശ്യങ്ങൾക്കും യാത്രപോകുന്ന വ്യക്തികൾക്ക് പ്രായഭേദമന്യേ ഇവ വാങ്ങാം. വിനോദസഞ്ചാരികൾ മുതൽ വിദ്യാഭ്യാസം, ബിസിനസ്, ചികിത്സാ ആവശ്യങ്ങൾക്ക് യാത്ര ചെയ്യുന്നർക്കുവരെ സുരക്ഷ ഉറപ്പാക്കാം.

- സി.എസ്.രഞ്ജിത്ത് പ്രമുഖ കോളമിസ്റ്റും വേൾഡ് ബാങ്ക് കൺസൽറ്റന്റുമാണ് ലേഖകൻ.

സ്വപ്നയാത്രകൾക്കിടയിൽ വന്നുകയറുന്ന തടസ്സങ്ങൾ സാമ്പത്തികനഷ്ടത്തോടൊപ്പം ജീവിതവും ദുഷ്കരമാക്കും. എന്നാൽ നിർമിതബുദ്ധി അടക്കമുള്ളവയുടെ പിൻബലത്തിൽ പരിഷ്കരിച്ച യാത്രാ ഇൻഷുറൻസ് പോളിസികൾ ഇത്തരം തടസ്സങ്ങൾക്കെതിരെ മികച്ച പരിരക്ഷ നൽകും. അതിനാൽ രാജ്യത്തിനകത്തും പുറത്തുമുള്ള യാത്രകളിൽ ഒഴിവാക്കാനാകാത്തതായി യാത്രാപോളിസികൾ മാറിക്കഴിഞ്ഞു. ഇത്തരം പോളിസികളെ അടുത്തറിഞ്ഞാലേ പൂർണമായി പ്രയോജനപ്പെടുത്താനാകൂ.

എന്താണ് യാത്രാ ഇൻഷുറൻസ്?

ദേശത്തും വിദേശത്തും വിവിധ ആവശ്യങ്ങ ൾക്കായി യാത ചെയ്യുമ്പോൾ ഉണ്ടാകാവുന്ന കഷ്ടനഷ്ടങ്ങൾക്ക് പരിരക്ഷ നൽകുന്ന നോൺ ലൈഫ് പോളിസികളാണ് യാത്രാ ഇൻഷുറൻസ്.

ആർക്കൊക്കെ സംരക്ഷണം?

ഏതാവശ്യങ്ങൾക്കും യാത്രപോകുന്ന വ്യക്തികൾക്ക് പ്രായഭേദമന്യേ ഇവ വാങ്ങാം. വിനോദസഞ്ചാരികൾ മുതൽ വിദ്യാഭ്യാസം, ബിസിനസ്, ചികിത്സാ ആവശ്യങ്ങൾക്ക് യാത്രചെയ്യുന്നവർക്കു വരെ ഈ ഇൻഷുറൻസ് ഉറപ്പാക്കാം. കുടുംബമായും സംഘങ്ങളായും യാത്രചെയ്യുന്നവർക്കായി ഗ്രൂപ്പ് പോളിസികളുണ്ട്. ചില പോളിസികളിൽ പരമാവധി പ്രായം 80 ആയിയിരിക്കും. മുതിർന്ന പൗരന്മാർക്കായി പ്രത്യേക യാത്രാപോളിസികൾ വിൽക്കുന്ന കമ്പനികളുമുണ്ട്.

പരിരക്ഷ എപ്പോൾ, എന്തിന്?

യാത്ര റദ്ദാക്കപ്പെടുക, വിമാനങ്ങൾ കണക്ഷൻ വൈകുക, ഫ്ലൈറ്റ് മിസാകുക, ചെക്ക്-ഇൻ ചെയ്ത പെട്ടികളും സാധനങ്ങളും വിട്ടുകിട്ടാതിരിക്കു കയോ നഷ്ടപ്പെടുകയോ ചെയ്യുക, പാസ്പോർട്ട് ഉൾപ്പെടെയുള്ള യാത്രാരേഖകൾ നഷ്ടപ്പെടുക എന്നിവയൊക്കെ ഏതു യാത്രയിലും സംഭവിക്കാം. ഇതിനു പുറമെയാണ് യാത്രയ്ക്കിടയിൽ ഉണ്ടാകുന്ന അസുഖങ്ങൾ അടക്കമുള്ള ആരോഗ്യ പ്രശ്നങ്ങൾ.