നാട്ടുവിപണി, മൂല്യവർധന ആണ്ടുവട്ടം ലാഭകൃഷി

കൃഷിരീതിയിലും വിപണനത്തിലും വേറിട്ട വഴിയിലൂടെ കൂടുതൽ വരുമാനം

- ജോബി ജോസഫ്

രണ്ടു മൂന്നു കൊല്ലം മുൻപാണ്, വിളവെടുത്ത 3 ടൺ പൈനാപ്പിൾ ഒരു പിക്കപ്പിൽ കയറ്റി മാർക്കറ്റിലെത്തിച്ചു. അതിൽ ഒരു ടണ്ണിലേറെ പൈനാപ്പിളിന് കച്ചവടക്കാരൻ വിലയിട്ടത് കിലോയ്ക്ക് വെറും 5 രൂപ. തൂക്കത്തിന്റെ അടിസ്ഥാനത്തിൽ എ, ബി, സി എന്നിങ്ങനെ തരംതിരിച്ചാണ് വ്യാപാരികൾ പൈനാപ്പിളിനു വിലയിടുന്നത്. എയും ബിയും തമ്മിൽ നേരിയ വ്യത്യാസമേ വരൂ. 1.200 ന് മുകളിൽ തൂക്കമുള്ളത് എ ഗ്രേഡ്. 1.100 എങ്കിൽ ബി. എ വിഭാഗത്തിന് കിലോ 40 രൂപയാണ് വിലയെന്നു കരുതുക. ബി ഗ്രേഡിന് കിട്ടുക 20 രൂപ മാത്രം. അതായത്, 100 ഗ്രാം തൂക്കം കുറഞ്ഞാൽ നേരെ പകുതി വില. 800 ഗ്രാമിൽ താഴെയാണു തൂക്കമെങ്കിൽ സി. അതോടെ വില വീണ്ടും കുത്തനെ താഴും. അന്നാണ് മൂല്യവർധനയെക്കുറിച്ചു ചിന്തിച്ചു തുടങ്ങിയത്'', പൈനാപ്പിളിൽ നിന്നുള്ള മൂല്യവർധിത ഉൽപന്നങ്ങൾ ചൂണ്ടി കോട്ടയം ജില്ലയിലെ മണിമല മുക്കട സ്വദേശി ജോസഫ് കുന്നം പള്ളിൽ പറയുന്നു.

പൈനാപ്പിളിന്റെ വിപണനത്തിൽ മാത്രമല്ല, കൃഷിരീതിയിലും വേറിട്ട വഴിയേ നീങ്ങുകയാണ് ജോസഫ്. അതു കൊണ്ടുതന്നെ വിപണിവിലയിലെ ഏറ്റക്കുറവ് ബാധിക്കാത്തവിധം കൃഷി എന്നും ലാഭകരമായി കൊണ്ടുപോകാനാവുന്നു.

25 ഏക്കറിൽ കൃഷി