പെടയ്ക്കുന്ന മീനല്ല തുടിക്കുന്ന കാളാഞ്ചി

എറണാകുളം നഗരത്തിൽ കർഷകന്റെ ലൈവ് ഫിഷ് വിൽപന

- 

പെടയ്ക്കുന്ന മീൻ എന്നു പറഞ്ഞു വിൽക്കുന്ന പലപ്പോഴും പെടയ്ക്കാറില്ല. അഥവാ ജീവനുണ്ടെങ്കിൽ കാരി, കൂരി, വാള, വരാൽ തുടങ്ങിയ ശുദ്ധ ജലമത്സ്യങ്ങളാവും. പിടയ്ക്കുന്ന കടൽമത്സ്യം കിട്ടാൻ കടപ്പുറത്തു പോകണം. എന്നാൽ കാളാഞ്ചി, കരിമീൻ, വറ്റ തുടങ്ങിയ കടൽമീനുകളെ വെള്ളത്തിൽനിന്ന് കോരിയെടുത്തു കൊണ്ടുപോകാമെന്നായാലോ കടപ്പുറമില്ലാത്ത എറണാകുളം കലൂരിലും വൈറ്റിലയിലുമൊക്കെ ലൈവ് ഫിഷ് എത്തിച്ച് അതിന് അവസരമൊരുക്കുകയാണ് കോട്ടപ്പുറം സ്വദേശി വലിയപറമ്പിൽ ജോസഫ് ഷിബു.

കപ്പൽഛേദം മൂലം കടൽ മീൻ കഴിക്കാനും വയ്യ, കഴിക്കാതിരിക്കാനും വയ്യ എന്ന സ്ഥിതിയിലാണ് മത്സ്യപ്രേമികൾ. കരയിൽ വളർത്തുന്ന മീൻ കാൽകാശിനു കൊള്ളില്ലെന്നു വാചകമടിച്ചവരൊക്കെ ശരിക്കും കുടുങ്ങി. എന്നാൽ, കൊച്ചിയിലെ കടൽമത്സ്യപ്രേമികൾക്ക് ഈ പ്രതിസന്ധിയിൽ തുണയായി ഷിബു. അറബിക്കടലിൽനിന്നല്ല, കോട്ടപ്പുറം കായലിൽ നിന്ന് അദ്ദേഹം ജീവനോടെയെത്തിച്ച മത്സ്യം ധൈര്യമായി വാങ്ങാൻ നഗരത്തിൽ ഏറെ ആളുകളുണ്ടായിരുന്നു.