ഗപ്പി നൽകുന്ന ഉറപ്പ്

ഗഷിസംരംഭത്തിലൂടെ ഉയർന്ന വരുമാനം നേടുന്ന മലപ്പുറം പറപ്പൂർ സ്വദേശി യൂസഫ്

- 

എളുപ്പത്തിൽ വളർത്താവുന്ന അലങ്കാരമത്സ്യം ഏതെന്നു "ചോദിച്ചാൽ ഈ രംഗത്തുള്ള ഏതൊരാളിന്റെയും ഉത്തരം ഗപ്പി എന്നായിരിക്കും. എത്രയോ കാലമായി ഗപ്പി നമ്മുടെ നാട്ടിലെത്തിയിട്ട്. ഇന്നും അലങ്കാരമത്സ്യപ്രേമികളുടെ ഇഷ്ടയിനങ്ങളിൽ മുൻനിരയിൽത്തന്നെ ഈ പൊടി മത്സ്യം. എണ്ണിയാൽ തീരാത്തത്ര ഇനങ്ങൾ. എത്ര കണ്ടാലും മതിവരാത്ത നിറച്ചാർത്തുകൾ. പരിപാലനം അൽപം കുറഞ്ഞാലും പരിഭവമില്ലാതെ നീന്തിത്തുടിക്കുന്നവർ. കാലമെത്ര കഴിഞ്ഞിട്ടും വിപണിയിൽ ഗപ്പി ഒളിമങ്ങാതെ തുടരുന്നത് ഇക്കാരണങ്ങൾകൊണ്ടെന്ന് ഗപ്പി സംരംഭകനായ മലപ്പുറം പറപ്പൂർ കൊടലിക്കാടൻ വീട്ടിൽ യൂസഫ്. ചിരപരിചിതമായ മത്സ്യയിനമെങ്കിലും ഇന്നും ഗപ്പിക്ക് അലങ്കാരമത്സ്യ വിപണിയിൽ ഉയർന്ന മൂല്യമുണ്ട്. ജോടിക്ക് 1000 രൂപ വരെ വിലയുള്ള ഗപ്പിയിനങ്ങൾ ഇന്നു വിപണിയിലുണ്ട്. അല ങ്കാരമത്സ്യ സംരംഭങ്ങളിലേക്ക് ഇറങ്ങുന്ന പലരും ഗപ്പിയിൽ ശ്രദ്ധവയ്ക്കുന്നതും അതുകൊണ്ടുതന്നെ. മുൻപ്, അലങ്കാരമത്സ്യങ്ങളിൽ ഏറ്റവും വില കുറഞ്ഞതും ഏറ്റവുമധികം അവഗണിക്കപ്പെട്ടിരുന്നതും ഗപ്പിയായിരുന്നു. കൊതുകിന്റെ കൂത്താടിയെ നശിപ്പിക്കാൻ ഓടകളിൽ നിക്ഷേപിച്ചിരുന്ന മത്സ്യം. എന്നാൽ ഇന്ന് ഗപ്പി പഴയ ഗപ്പിയല്ലെന്ന് യൂസഫ്. 8-10 വർഷങ്ങൾക്കിടയിൽ അലങ്കാരമത്സ്യങ്ങളിലെ താരമായി മാറി ഈ കുഞ്ഞൻ. ഗപ്പി ക്ലബ്ബുകളും രാജ്യാന്തര ഗപ്പി പ്രദർശന മത്സരങ്ങളുമെല്ലാം ഇന്നു നമ്മുടെ നാട്ടിലും നടക്കുന്നു. തൃശൂർ പോലുള്ള പ്രദേശങ്ങൾ ഗപ്പിയുടെ ഹബ് ആയി വളരുകയും ചെയ്തു. മലേഷ്യയും തായ്ലൻഡും പോലുള്ള പ്രദേശങ്ങളിൽ നിന്ന് പുതിയ ഇനങ്ങൾ വന്നു തുടങ്ങിയതോടെയാണ് ഗപ്പിയുടെ തലവര മാറിയത്.

വർണമത്സ്യം വരുമാനമത്സ്യം