അമിതവണ്ണം ഒഴിവാക്കാൻ 3 സാലഡുകൾ

പാചകം ചെയ്യാതെ പച്ചയ്ക്കു കഴിക്കാവുന്ന ആരോഗ്യവിഭവങ്ങളും അവ ഒരുക്കുന്ന വിധവും അവയുടെ ആരോഗ്യഗുണങ്ങളും പരിചയപ്പെടുത്തുന്ന പംക്തി

- ഡോ. കെ.എസ്. രജിതൻ

അമിതവണ്ണം മിതവണ്ണം ഒട്ടേറെ ആരോഗ്യപ്രശ്നങ്ങൾക്കു കാരണമാകുന്നുണ്ട്. ശരീരത്തിൽ കൊഴുപ്പ് അടിഞ്ഞു കൂടുന്നതാണ് അമിതവണ്ണത്തിനു പ്രധാന കാരണം. സ്ത്രീകളിൽ കൊഴുപ്പിന്റെ അളവ് 30 ശതമാനത്തിലധികമാണങ്കിലും പുരുഷന്മാരിൽ 25 ശതമാനത്തിലധികമാണെങ്കിലും അത് അമിതവണ്ണമാണ്. ശരീരം അനങ്ങി ജോലി ചെയ്യാത്തതും വ്യായാമമില്ലായ്മയും അമിതഭക്ഷണവുമാണ് അമിതവണ്ണത്തിനു പ്രധാന കാരണം. ക്രമമല്ലാത്ത ഭക്ഷണവും തെറ്റായ ജീവിതരീതികളുമാണ് ഇപ്പോൾ പലരുടെയും. വ്യായാമമില്ലായ്മ, അമിതമായ ഉറക്കം, വിശേഷിച്ച് പകലുറക്കം, കഫം വർധിപ്പിക്കുന്ന ആഹാരനീഹാരങ്ങൾ, അമിത മധുരവും കൊഴുപ്പുമുള്ള ആഹാരപാനീയങ്ങളുടെ അമിതോപയോഗം എന്നിവയെല്ലാം അമിതവണ്ണത്തിനു കാരണമാകുന്നു. രാത്രിയിലായാലും പകലായാലും ഭക്ഷണം കഴിച്ച ഉടൻ ഉറങ്ങുന്നതും അമിതവണ്ണം ഉണ്ടാക്കാം. ചില രോഗ ങ്ങളും അമിതവണ്ണത്തിനു കാരണമാകാം.