മരുഭൂമിക്കായി കടപ്പുറത്തൊരു കൃഷി

മണ്ണില്ലാക്കഷിയിലെ വേറിട്ട ശൈലികളുമായി യുവസംരംഭകൻ

- ജയിംസ് ജേക്കബ് തുരുത്തുമാലി

താർ മരുഭൂമിയിൽ തക്കാളി കൃഷി ചെയ്താലോ? തീരപ്രദേശത്തെ മണലിലായാലോ കൃഷി? തുള്ളിവെള്ളം പോലും തങ്ങിനിൽക്കാത്ത മണലിൽ കൃഷിയിറക്കാനാവില്ലെന്ന പൊതുധാരണ തിരുത്തുകയാണ് ഇജാസ് സലിം. ആറു വർഷമായി ഈ എൻജിനീയർ മണലിൽ പച്ചക്കറികൾ പാകി വിളവെടുക്കുന്നു. അഞ്ചോ പത്തോ സെന്റല്ല, 15 ഏക്കർ മണൽ ഭൂമിയിലാണ് ഇദ്ദേഹം വെണ്ടയും വെള്ളരിയും പയറുമൊക്കെ ഉൽപാദിപ്പിക്കുന്നത്. ഈർപ്പം നിലനിൽക്കില്ലെന്ന ദോഷം പരിഹരിച്ചാൽ മണലിലെ കൃഷിക്കു പലതാണ് മെച്ചമെന്ന് ഇജാസ് പറയുന്നു. ഇത്രയും സമൃദ്ധമായ വെയിലും വേണ്ടത്ര സ്ഥലവും മറ്റെവിടെക്കിട്ടും? നിർഗുണവസ്തുവായ മണലിൽ രോഗ, കീടബാധകളും കുറവായിരിക്കും കാലിയായി കിടക്കുന്ന തീരങ്ങളെ ഇപ്രകാരം ഹരിതാഭമാക്കാം.

യൂറോപ്പിൽ നിന്നു റിന്യൂവബിൾ എനർജിയിൽ എം ടെക് നേടി ആ മേഖലയിൽ പ്രവർത്തിക്കുകയായിരുന്ന ഇജാസിന്റെ സ്വപ്നങ്ങൾ പക്ഷേ, കടപ്പുറത്ത് ഒതുങ്ങുന്നില്ല. രാജ്യാന്തരതലത്തിൽ മണലിലെ കൃഷിക്കുള്ള സാധ്യ തയാണ് ഇജാസിനെ പ്രചോദിപ്പിക്കുന്നത്. ഗൾഫിലെയും ആഫ്രിക്കയിലെയുമൊക്കെ മരുഭൂമികളിൽ ഭക്ഷ്യോൽപാദനം സാധ്യമാകുന്ന സാങ്കേതികവിദ്യയാണ് ലക്ഷ്യം. രാസവളങ്ങൾ പൂർണമായും ഒഴിവാക്കി ജൈവവളക്കൂട്ടുകൾ മാത്രം ഫെർട്ടിഗേഷനിലൂടെ നൽകി മണലിൽ കൃഷി നന്നായി നടത്താമെന്ന് അദ്ദേഹം പറഞ്ഞു.