സജേഷിന്റെ സജഷൻ

 വീട്ടിലേക്കുവേണ്ട ഭക്ഷ്യവസ്തുക്കളെല്ലാം 40 സെന്റിൽ. ഒപ്പം മികച്ച വരുമാനവും

- 

നാട്ടുവഴിയരികിലെ 30 സെന്റിൽ വീട്. തൊട്ടുപിന്നിലായി 10 സെന്റ് പാടം. ആകെയൊരു കാൽപനിക അന്തരീക്ഷം. അവിടെ നെല്ലും പാലും പച്ചക്കറിയും മുട്ടയും മാംസവുമൊക്കെ ഉൽപാദിപ്പിച്ച് കൃഷിജീവിതം ആഘോഷമാക്കുകയാണ് സജേഷും ഭാര്യ സുജിതയും കുടുംബത്തിനാവശ്യമായ ഭക്ഷണവും വരുമാനവും വീട്ടുവളപ്പിൽ തന്നെ ഉൽപാദിപ്പിക്കാൻ ഇവർക്കു കഴിയുന്നു.

ഒന്നര വർഷത്തെ പ്രവാസ ജീവിതത്തിനു ശേഷം 2010ൽ നാട്ടിലെത്തിയ സജേഷ് ചെറുജോലികൾ ചെയ്തു വരികയായിരുന്നു. എന്നാൽ അചൻ തളർന്നു കിടപ്പിലായതോടെ വീട്ടിൽ തന്നെ നിൽക്കാൻ നിർബന്ധിതനായി. ക്ഷീരകർഷകനായിരുന്ന അച്ഛനു സന്തോഷമേകാനായി പശുക്കിടാവിനെ വാങ്ങിയാണ് സജേഷിന്റെ കാർഷിക ജീവിതം ആരംഭിക്കുന്നത്. വൈകാതെ ഒരു പശുവിനെക്കൂടി വാങ്ങി. ക്രമേണ ഉരുക്കളുടെ എണ്ണംകൂടി. കുടുംബവീതമായി ലഭിച്ച പറമ്പിലേക്ക് തൊഴുത്തു മാറ്റി ഫാം വിപുലമാക്കി. ആകെ പശുക്കളുടെ എണ്ണം 18 ആയി. ക്ഷീരസംഘത്തിൽ കൂടുതൽ പാലളന്നതിനുള്ള അവാർഡും നേടി. കുടുംബസ്വത്തായി സ്ഥലം കിട്ടിയപ്പോൾ എന്തെങ്കിലുമൊക്കെ നട്ടുവളർത്താനുള്ള ആവേശമായിരുന്നു. തെങ്ങിൻതൈകൾ നട്ടു. അവയ്ക്കിടയിലൂടെ പച്ചക്കറികളും നടുതലകളും കൃഷി ചെയ്തു. പശുവളർത്തലിലൂടെ ലഭിച്ച വരുമാനം കൂടി ചേർത്ത് സ്വന്തമായി വീടും വച്ചു. അതിനു ശേഷമായിരുന്നു വിവാഹം. കൃഷി ചെയ്യാനുള്ള ആവേശം മൂലം പുരയിടത്തോടു ചേർന്നു കിടക്കുന്ന 18 സെന്റും പറമ്പും 10 സെന്റ് വയലും കൂടി വാങ്ങി.