ശ്രദ്ധയില്ലെങ്കിൽ സമ്പത്തും പോകും സൽപ്പേരും മുകേഷ്

മലയാള സിനിമയിൽ പ്രവർത്തിക്കുന്ന ഒരു വ്യക്തി അല്ലെങ്കിൽ ഒരു കലാകാരൻ കേരള നിയമസഭയിലെത്തുമ്പോൾ തീർച്ചയായും മലയാള സിനിമയ്ക്ക് പ്രാധാന്യവും സ്വാധീനവും ഉണ്ടാകും. ഇങ്ങനെ പലരും മലയാള സിനിമയിലെത്തിയിട്ടുണ്ട് അവരിൽ ഒരാളാണ് മുകേഷ്.

- ജി. കൃഷ്ണൻ

മുകേഷ് ഇപ്പോൾ നടൻ മാത്രമല്ല, എം.എൽ.എയും കൂടിയാണ്. അസംബ്ലി മെമ്പർ, തൊടുപുഴയിൽ സണ്ണി ഡെയ്സ്' എന്ന സിനിമയുടെ ലൊക്കേഷനിൽ വച്ച് മുകേഷിനെ കാണുമ്പോൾ പല രീതിയിൽ പ്രതിസന്ധികളെ നേരിടുന്ന മലയാള സിനിമയ്ക്കുവേണ്ടി താങ്കൾ ചെയ്യുന്ന സംഭാവനകളെക്കുറിച്ചും സ്വാധീനത്തെക്കുറിച്ചും സഹായത്തിനെക്കുറിച്ചും ചോദിക്കുകയുണ്ടായി.

മുകേഷ് പറഞ്ഞു.

നിയമസഭയിലേക്കുള്ള എന്റെ എല്ലാ പ്രസംഗങ്ങളിലും വളരെ ബോധപൂർവ്വം ഒന്നും മറക്കാതെ സിനിമയുടെ ഇപ്പോഴത്തെ അവസ്ഥയെക്കുറിച്ച് രണ്ട് പാരഗ്രാഫ് പറയാറുണ്ട്. സിനിമയുടെ മോശപ്പെട്ട അവസ്ഥ എങ്ങനെ പരിഹരിക്കാമെന്നും നന്നാക്കിയെടുക്കാൻ കഴിയുമെന്നും ആവശ്യപ്പെടാറുണ്ട്.

സിനിമയിലെ കലാകാരന്മാർക്കുവേണ്ടി മാത്രമല്ല, നാടകരംഗത്തും മറ്റു മേഖലകളിലുമുള്ള കലാകാരന്മാർക്കും എന്തെല്ലാം സഹായം ചെയ്യാൻ കഴിയുമെന്ന കാര്യത്തിൽ ഞാൻ ശ്രദ്ധ വയ്ക്കാറുണ്ട്.

ഏറ്റവും പുതിയ ഉദാഹരണമായി എനിക്ക് പറയാൻ കഴിയുന്നത് നടൻ ജോജുജോർജിന് ഉണ്ടായ പ്രശ്നമാണ്. ജോജു ജോർജിന്റെ പ്രശ്നം എന്തുമായി കൊള്ളട്ടെ. അദ്ദേഹം അഭിനയിച്ചുകൊണ്ടിരിക്കുന്ന സിനിമകളുടെ ഷൂട്ടിംഗ് മുടക്കുന്നു, അത് വല്ലാതങ്ങ് വ്യാപിക്കുന്നതായി അറിഞ്ഞപ്പോൾ ഈ പ്രശ്നത്തിന് പരിഹാരം കാണേണ്ടതായി വന്നു. അത് കോടതി മുഖേനയോ പോലീസ് മുഖേനയോ ഒക്കെ തീർക്കേണ്ടതായി വരുന്ന സാഹചര്യമാണുണ്ടായത്. ജോജുവിന്റെ പ്രശ്നം സിനിമാമേഖലയെ മൊത്തം സ്വാധീനിക്കുന്നതായി തോന്നിയപ്പോൾ ഞാൻ നേരെ മുഖ്യമന്ത്രിയുടെ അടുത്തു ചെന്നിട്ടുപറഞ്ഞു.

ആ നടനെ അഭിനയിക്കാൻ സമ്മതിക്കുന്നില്ലെന്ന് മാത്രമല്ല, മറ്റുള്ള സിനിമാസെറ്റുകളിലും ഇവർ കുഴപ്പമുണ്ടാക്കുന്നുണ്ട്. അത് വളരെ അപകടകരമായ ഒരു പോക്കാണെന്നും ഇതിനൊരു പരിഹാരം കാണണമെന്നു പറഞ്ഞപ്പോൾ സി.എം. ഉടനെതന്നെ അതിന് മറുപടി തന്നു.