അമ്മച്ഛന്റെ കഥാകടങ്ങൾ

വഴിവിളക്കുകൾ

- വിനോദ് കൃഷ്ണ

കുട്ടിക്കാലത്തോടുള്ള കടം വീട്ടാൻ ആണ് ഞാൻ എഴുതുന്നത്. ഏറ്റവും കൂടുതൽ കഥകൾ കേൾക്കുന്നതും അറിയാൻ ശ്രമിക്കുന്നതും ആ കാലത്താണല്ലോ. ഇപ്പോൾ തിരിഞ്ഞു നോക്കുമ്പോൾ തെളിഞ്ഞുവരുന്നത് അമ്മച്ഛനെ (അമ്മയുടെ അച്ഛൻ)കുറിച്ചുള്ള ഓർമകളാണ്.

അമ്മച്ഛൻ ആണ് സത്യത്തിൽ എനിക്കു കഥകൾ തന്നത്. അമ്മയും അച്ഛനുമൊത്ത് - ബിഹാറിൽ നിന്ന് അവധിക്കു വരുമ്പോൾ അമ്മച്ഛൻ കാഴ്ചകൾ കാണാൻ കൊണ്ടുപോകും. ആദ്യമായി ഞാൻ കടൽ കണ്ടത് അമ്മച്ഛന്റെ കൈ പിടിച്ചു കൊണ്ടാണ്. കോഴിക്കോട്ടെ മിഠായിത്തെരുവിൽ ആൾക്കൂട്ടങ്ങൾക്കിടയിൽ നടന്നതും അമ്മച്ഛന്റെ കൂടെയാണ്. മുങ്ങാംകുഴിയിടാൻ പഠിപ്പിച്ചതും ചൂണ്ടയിടാൻ പഠിപ്പിച്ചതും മറ്റാരുമല്ല. കഠിന വേനലിൽ വിശാലമായ വയലിൽ രാത്രികാലങ്ങളിൽ നടക്കാൻ കൊണ്ടുപോകുമ്പോൾ അദ്ദേഹം പറഞ്ഞ കഥകളാണ് എന്നെ ഭാഷയിലേക്കടുപ്പിച്ചത്. ആ നറേഷനിൽ നിന്നാവാം ഞാൻ ആഖ്യാനകല പഠിച്ചത്.