உப்பு....நல்லதா கெடுதலா..?

சமீபத்தில் ஐசிஎம்ஆர் எனப்படும் இந்திய மருத்துவ ஆராய்ச்சிக் கவுன்சிலின் புதிய ஆய்வில் இந்தியர்கள் உணவில் அதிகளவு உப்பை எடுத்துக் கொள்வதாகத் தெரிய வந்துள்ளது.

- பேராச்சி கண்ணன்

உலக சுகாதார நிறுவனம் 5 கிராமிற்கும் குறைவான உப்பை எடுத்துக் கொள்வது நல்லதென பரிந்துரைக்கிறது.

ஆனால், இந்தியாவில் நகர்ப்புறப் பகுதிகளில் ஒரு நாளைக்கு சராசரியாக 9.2 கிராமும், கிராமப்புறப் பகுதிகளில் 5.6 கிராம் என்ற அளவிலும் பரிந்துரைக்கப்பட்ட அளவைவிட இரண்டு மடங்கு அதிகமாக உட்கொள்வதாக ஐசிஎம்ஆரின் தேசிய தொற்றுநோயியல் நிறுவன விஞ்ஞானிகள் புதிய ஆய்வின் வழியே கண்டறிந்துள்ளனர்.

இது உயர் இரத்த அழுத்தம், இதயநோய், பக்கவாதம் மற்றும் சிறுநீரக நோய் போன்ற கடுமையான உடல் அபாயங்களுக்கு வழிவகுக்கும் என்றும் தெரிவித்துள்ளனர்.

உலக சுகாதார நிறுவனம் ஒவ்வொரு ஆண்டும் சுமார் 19 லட்சம் பேர் அதிகப்படியான உப்பை உட்கொள்வதால் மேற்சொன்ன நோய்களுக்கு ஆட்பட்டு இறப்பதாக மதிப்பிட்டுள்ளது.

இந்நிலையில் உப்பு எனும் சோடியம் குளோரைடின் அதிகப்படியான பயன்பாட்டை குறைக்கும் வகையில் பொட்டாசியம் அல்லது மெக்னீசியம் உப்புகள் மார்க்கெட்டில் ஒரு மாற்றாக வந்துள்ளன.

அதாவது இவை குறைந்த சோடியம் உப்புகள். இது ஒரு தீர்வாக இருந்தாலும் இதுவும் அதிகளவுக்கு எடுத்துக் கொண்டால் பிரச்னைதான்.

ஏற்கனவே அயோடின் கலந்த உப்பை அயோடின் குறைபாடு உள்ளவர்கள் எடுத்துக் கொள்ளட்டும். அனைவருக்கும் ஏன் அவசியம் என எதிர்ப்புகள் இருக்கின்றன. இந்நிலையில் உப்பு இரண்டு மடங்கு எடுத்துக் கொள்வதாக வந்திருக் கும் தகவல் இன்னும் அச்சத்தைத் தருகிறது.

இதுகுறித்து சிவகங்கையைச் சேர்ந்த பொதுநல மருத்துவர் அ.ப.ஃபரூக் அப்துல்லாவிடம் பேசினோம்.

“ஒரு மனிதனுக்கு உப்பு எதற்கு தேவைனா, முக்கிய சுரப்புகளான வேர்வை, கண்ணீர், சிறுநீர், விந்து ஆகியவற்றில் உப்பு இருக்கிறது. கூடவே புரதத்தை செரிமானம் செய்யத் தேவையான, இரைப்பையில் ஹைட்ரோகுளோரிக் அமிலம் உருவாக குளோரைடின் தேவை இருக்கிறது. எனவே, சோடியம் என்பது அத்தியாவசியமாக உணவு வழி உட்கொள்ள வேண்டிய தாது உப்பாக இருக்கிறது. இதை உடலால் வேறு வழிகளில் உற்பத்தி செய்ய இயலாது.