சென்னையில் சீனாவின் தாய்ச்சி!

கராத்தே, குங்ஃபூ, டேக்வாண்டோ, ஜூடோ உள்ளிட்ட தற்காப்புக் கலைகள் பற்றி அறிந்திருப்போம்.

- பேராச்சி கண்ணன்

ஆனால், தாய்ச்சி கலை குறித்து அவ்வளவாக தெரிந்திருக்க வாய்ப்பில்லை.

சீன தற்காப்புக் கலைகளில் ஒன்றான இந்தத் தாய்ச்சியை சுமார் 30 ஆண்டுகளாக சென்னையில் கற்றுக் கொடுத்து வருகிறார் சிஃபு ஜார்ஜ் தாமஸ்.

அதுமட்டுமல்ல, இந்தியாவில் முதன்முதலாக இந்தக் கலையை கற்றுக் கொடுத்தவரும் இவர்தான். இதில் சிஃபு என்பது சீன மொழியில் மாஸ்டர் அல்லது ஆசிரியர் என்று அர்த்தம். தற்போது சென்னை கோட் டூர்புரத்தில் உள்ள ஒரு தன்னார்வ அமைப்பின் கட்டடத்தில் சனி மற்றும் ஞாயிற்றுக்கிழமை காலை தாய்ச்சி வகுப்புகளை எடுக்கிறார்.

சிஃபு ஜார்ஜ் தாமஸ். ஒரு சிறிய அரங்கம். பின்ன ணியில் இனிமையான இசை. சுமார் 15 பேர் கொண்ட குழுவினர் மாஸ்டர் ஜார்ஜ் தாமஸின் கட்டளைகளைக் கேட்டபடியே கைகளையும், கால்களையும் அத்தனை லாவகமாக அசைத்தபடி இருந்தனர்.

பார்ப்பதற்கு ஒரு நடனம் போலவே இருக்கின்றது அந்த அசைவுகள். தொடர்ந்து 20 நிமி டங்கள் விடாமல் நீள்கிறது இந்த பயிற்சி.

"தாய்ச்சியில் நிறைய அசைவுகள் இருக்கின்றன. இதனை ஃபார்ம்ஸ் எனக் குறிப்பிடுவோம். அதாவது வரிசைகள். அப்படியாக மொத்தம் 85 ஃபார்ம்ஸ் இதில் உள்ளன.

ஓபனிங் ஃபார்ம், கிராஸ்பிங் த பீகாக்ஸ் டெயில், சிங்கிள் விப், ரைஸ் ஹேண்ட்ஸ், லெஃப்ட் நீ பிரஷ், கிராஸ் ஹேண்ட்ஸ் என இதற்குப் பெயர்களும் உண்டு.

சில வரிசையில் ஓர் அசைவு இருக்கும். சில வரிசையில் ஐந் தாறு அசைவுகள் இருக்கும். ஒவ்வொன்றுக்கும் ஒரு பெயர்.

இதன்பிறகு வாள் வைத்து செய்யும் தாய்ச்சி பயிற்சிகள் தனியானது...” ஆத்மார்த்தமாகப் பேசும் சிஃபு ஜார்ஜ் தாமஸ், பிறந்து வளர்ந்ததெல்லாம் சென்னையில்தான்.

“பள்ளிப் படிப்பை முடித்ததும் அப்பாவின் டெக்ஸ் டைல்ஸ் பிசினஸுக்கு வந்துவிட்டேன். படிப்பில் நான் அவரேஜ். எனக்கு ஆட்டோமொபைல் எஞ்சினியரிங் படிக்க ஆசை. ஆனால், அப்பாவுக்கு உடல்நிலை சரியில்லாமல் போனதால் பிசினஸிற்குள் வந்தேன். அப்பாவும் 1980ல் தவறி விட்டார்.

அதற்கு சில ஆண்டுகளுக்கு முன் 1977ல் கராத்தே வகுப்பில் சேர்ந்தேன். இதில் பிளாக்பெல்ட் கிரேடிங்கிற்காக கிராண்ட் மாஸ்டரை சந்திக்க சிங்கப்பூர் மற்றும் மலேசியாவில் சர்வதேச கராத்தே போட்டிகள் நடக்கும். அதில் பங்கேற்க 1983ம் ஆண்டு சிங்கப்பூருக்கும், மலேசியாவிற்கும் சென்றோம்.